ەلىمىزگە شەتەلدەن الما اكەلۋگە تىيىم سالىنعان.
پرەمەر-مينيستردىڭ ورىنباسارى سەرىك جۇمانعارين قازاقستانعا الما اكەلۋگە تىيىم سالىنۋ اياسىندا، ءونىم باعاسىنىڭ قىمباتتاۋ مۇمكىنشىلىگى قانشالىقتى ەكەنىن ايتتى، دەپ حابارلايدى aqshamnews.kz
ول قازاقستان اعىمداعى جىلدىڭ 31 جەلتوقسانىنا دەيىن ءۇشىنشى ەلدەردەن الما اكەلۋگە تىيىم سالعانىن ەسكە سالدى.
"ءبىز بىرنەشە جىل بويى الما يمپورتىن الماستىرۋ باعدارلاماسىن جۇرگىزىپ كەلەمىز. بيىل ءبىز 300 مىڭ توننا ءونىم كۇتىپ وتىرمىز — وسىلايشا ىشكى نارىقتى تولىعىمەن قامتاماسىز ەتەمىز. فەرمەرلەر بۇل ءۇشىن كوپ كۇش جۇمسادى"،-دەپ ءتۇسىندىردى سەرىك جۇمانعارين.
ونىڭ ايتۋىنشا، قازاقستاندا بۇل ءونىم باعاسىنىڭ كۇرت ءوسۋى كۇتىلمەيدى.
"ءبىز وندىرۋشىلەرمەن كەلىسىم جاسادىق — ەگەر الما باعاسى كوتەرىلە باستاسا، ءبىز تىيىم سالۋدى الىپ تاستايمىز. بۇل قولداۋدىڭ شارتى"،-دەپ اتاپ ءوتتى سەرىك جۇمانعارين.