جۇلدە قورى 12 300 000 تەڭگە.
قازاقستان جازۋشىلار وداعى ۇيىمداستىرعان «ايتۇمار» رەسپۋبليكالىق بايقاۋىنىڭ جەڭىمپازدارى ماراپاتتالدى، دەپ حابارلايدى Almaty-akshamy.kz قازاقستان جازۋشىلار وداعىنا سىلتەمە جاساپ.
بالالار ادەبيەتىنىڭ ۇزدىك تۋىندىلارى ءۇشىن 12 300 000 تەڭگە جۇلدە تاعايىندالدى.
بايقاۋعا پوەزيا، پروزا جانە دراماتۋرگيا باعىتتارى بويىنشا 200-گە تارتا شىعارما كەلىپ ءتۇستى. ءار جانر بويىنشا 6 ادام جەڭىمپاز اتاندى. ءار اتالىمنان ءبىرىنشى ورىن يەگەرىنە 1 ملن تەڭگە بەرىلدى. ەكىنشى ورىن ەكى ادامعا بۇيىرىپ، ءارقايسىسى 800 مىڭ تەڭگەدەن السا، ءۇشىنشى ورىنعا ءۇش جەڭىمپاز انىقتالدى. ولاردىڭ ءارقايسىسى 500 مىڭ تەڭگەدەن الدى.
پروزا جانرى بويىنشا ءى ورىن ارمان ادىلبەك، پوەزيا جانرى بويىنشا ءى ورىندى مەرەي قارت، دراماتۋرگيا بويىنشا ءى ورىن نازەركە قۇمارعالييەۆا جەڭىمپاز اتاندى.
بايقاۋعا 14-35 جاس ارالىعىنداعى قازاقستان اۋماعىندا تۇراتىن كەز كەلگەن قالامگەر قاتىسا الدى. ءار قاتىسۋشىدان تەك ءبىر عانا اتالىم بويىنشا شىعارمالار قابىلداندى. بايقاۋدا جالپى 18 جەڭىمپاز ماراپاتتالدى.
«اتالمىش بايقاۋ بالالار جىلىنىڭ ەڭ وزىق ءىس-شارالارىنىڭ ءبىرى بولىپ وتىر. سوڭعى جىلدارى قازاق ادەبيەتىندە بالالار ادەبيەتى جانرىنىڭ كەنجە قالىپ بارا جاتقانى، ال ەرەكشە بالالار ءۇشىن ادەبيەتتىڭ ءتىپتى دە قولجەتىمسىزدىگى ءجيى ايتىلىپ ءجۇر. مۇنىمەن قوسا «مەنىڭ اتىم قوجا» سىندى تۇتاس بۋىندى تاربيەلەيتىن شىعارمالاردىڭ جوقتىعىنا زيالى قاۋىم وكىلدەرى قىنجىلىس ءبىلدىرىپ جاتادى. بۇل رەتتە قازاقستان جازۋشىلار وداعى ءتول ادەبيەتىمىزدى دامىتۋ ءۇشىن اۋقىمدى جوبالار ۇيىمداستىرىپ كەلەدى. «ايتۇمار» بالالار ادەبيەتى تۋىندىلارىنىڭ رەسپۋبليكالىق بايقاۋى وسىعان دالەل»، - دەدى قازاقستان جازۋشىلار وداعىنىڭ باسقارما ءتوراعاسى، اقىن ۇلىقبەك ەسداۋلەت.
بالالارعا، ونىڭ ىشىندە ولاردىڭ مۇمكىندىگى شەكتەۋلى قاتارلاستارىنا قولجەتىمدى، ءارى وڭاي وقىلۋ ءۇشىن بايقاۋعا كەلىپ تۇسكەن شىعارمالاردىڭ اۋديو، ەلەكتروندى نۇسقالارى ازىرلەنەدى. سونىمەن قاتار جەڭىمپاز اتانعان شىعارمالار جيناقتالىپ، كىتاپ بولىپ جارىق كورەدى. كىتاپ ەلىمىزدەگى 200-گە تارتا كىتاپحاناعا، ينكليۋزيۆتى ورتالىقتار مەن بالالار ۇيىنە تاراتىلادى.