ايسانا قازاق تىلىندە سويلەيدى.
قازاقستاندا قازاق تىلىندە سويلەپ، اۆتوماتتى تۇردە جاۋاپ بەرەتىن ۆيرتۋالدى روبوت ازىرلەۋ جۇمىسى قولعا الىنباق. وعان «ايسانا» دەگەن ات بەرىلەدى. بۇل تۋرالى عجبم ءتىل ساياساتى كوميتەتى دايىنداعان قازاقستاندا ءتىل ساياساتىن دامىتۋدىڭ 2023-2029 جىلدارعا ارنالعان تۇجىرىمداسى جوباسىنان بەلگىلى بولدى.
ايسانا الەمدەگى تانىمال داۋىستىق كومەكشىلەر – Google Assistant (Google)، Siri (Apple)، Amazon Echo نە Alexa (Amazon)، Cortana (Microsoft) جانە اليسا (Yandex) ۆيرتۋالدى روبوتتارىنىڭ قازاقشا بالاماسى بولماق.
«قازىرگى ۋاقىتتا دىبىستىق كومەكشى ازىرلەۋدىڭ ماڭىزى زور. بۇگىندە كوپشىلىككە تانىمال «اليسا»، «Alexa»، «Cortana» مەن «Siri» ءتارىزدى ونىمدەر ءماتىندى پەرنەتاقتا مەن ءتىنتۋىردى پايدالانباي ەنگىزۋ، قولدانۋشىنىڭ اۋىزشا كومانداسى ارقىلى قاجەتتى سايتقا، اقپاراتقا، باعدارلامالارعا جىلدام قول جەتكىزۋ، ەسكە سالۋ، قوڭىراۋ شالۋ، حابارلامالار جازۋ، جاڭالىقتاردى دىبىستاۋ، «اقىلدى ءۇي» فۋنكسيالارىن ورىنداۋ، ءتىپتى جاساندى ينتەللەكتىنىڭ ارقاسىندا جەتىلىپ، اداممەن تولىققاندى ديالوگ ورناتۋ مۇمكىندىگىنە يە بولدى. وسى رەتتە وتاندىق «ايسانا» ۆيرتۋالدى روبوتىن ازىرلەۋ جۇمىستارى جۇرگىزىلەدى»، – دەلىنگەن تۇجىرىمداما جوباسىندا.
بۇل باعىتتاعى جۇمىستاردى ىسكە اسىرۋ ءۇشىن عىلىم جانە جوعارى ءبىلىم مينيسترلىگى الەمدىك ىت-كومپانيالارمەن كەلىسىمگە وتىرۋدى جوسپارلاپ وتىر. سونداي-اق، ءقازاقتىلدى ءىت-ماماندار دايارلاۋ جانە ارنايى گرانتتار ءبولۋ ماسەلەلەرى شەشىلەدى.
«بۇل شارالاردىڭ ىسكە اسىرىلۋى حالىقتىڭ قازاق تىلىندەگى سيفرلىق ساۋاتتىلىعىن ارتتىرۋعا جانە ءقازاقتىلدى تۇتىنۋشىلاردىڭ سۇرانىسىن تولىق قاناعاتتاندىرۋعا مۇمكىندىك بەرەدى»، – دەلىنگەن تۇجىرىمداما جوباسىندا.
قۇجاتتى جاريا تالقىلاۋ مەرزىمى – 21 ساۋىرگە دەيىن.