"Air Astana" 21ء-شى جىلدىعىن اتاپ وتۋدە. وسى ۋاقىت ىشىندە اۋەكومپانيا جولاۋشىلارعا قىزمەت كورسەتۋ، وپەراسيالىق تيىمدىلىك، قاۋىپسىزدىكتىڭ جوعارى ستاندارتتارى جانە اكسيونەرلەردىڭ نەمەسە ۇكىمەتتىڭ قارجىلىق قولداۋىنسىز تابىستى قىزمەتى ءۇشىن بەدەلدى ماراپاتتارعا يە بولدى، دەپ حابارلايدى almaty-akshamy.kz
كومپانيانىڭ كوپ جىلدىق تابىسى 2022 جىلى ەڭ جوعارى دەڭگەيگە جەتتى، كومپانيالار توبىنىڭ تازا كىرىسى 78،4 ميلليون اقش دوللار، جالپى كىرىسى 1،03 ميلليارد اقش دوللارىن قۇرادى. بىلتىر "Air Astana" جانە "FlyArystan" قۇرىلىمدىق بيۋدجەتتىك بولىمشەسىمەن بىرگە 7،35 ميلليون جولاۋشىنى تاسىمالدادى.
كومپانيالار توبى جۇڭگو، گرۋزيا، گەرمانيا، ءۇندىستان، وڭتۇستىك كورەيا، تايلاند، تۇركيا، ءباا جانە ۇلىبريتانيانى قوسا ەسەپتەگەندە 90-نان استام ىشكى جانە حالىقارالىق باعىتتارعا قاتىنايدى. توپتىڭ زاماناۋي اۋەپاركى Airbus، Boeing جانە Embraer تيپتەگى 43 ۇشاقتان تۇرادى.
يننوۆاسيا - اۋەكومپانيانىڭ ستراتەگيالىق دامۋىنىڭ نەگىزى. ول ىشكى نارىقتى دامىتۋ باستاماسى. سونىڭ ارقاسىندا 2010 جىلدان باستاپ كورشىلەس ورتالىق ازيا ەلدەرى مەن كاۆكاز وڭىرىنەن الماتى مەن استاناعا جولاۋشىلار اعىنى ءوستى.
2019 جىلى قۇرىلعان FlyArystan بيۋدجەتتىك بولىمشەسى - 2022 جىلدىڭ قورىتىندىسى بويىنشا ىشكى جانە حالىقارالىق باعىتتار بويىنشا 3،2 ملن-نان استام جولاۋشىنى تاسىمالداعان.
وتكەن جىلدارداعى جەتىستىكتەردىڭ قاتارىندا مىنالاردى اتاپ ءوتۋ ماڭىزدى:
2008 جىلى ab-initio ۇشقىشتارىن دايارلاۋ بويىنشا دەربەس باعدارلاماسىن ىسكە قوسۋ، سونىڭ ارقاسىندا 300-گە جۋىق بىلىكتى ۇشقىش شىقتى؛ 2007 جىلى Nomad Club ءجيى ۇشاتىن جولاۋشىلارعا ارنالعان جەكە باعدارلاماسىن ەنگىزۋ؛
2018 جىلى استانادا C-check ورىنداۋعا تەحنيكالىق مۇمكىندىگى بار ءوزىنىڭ ينجەنەرلىك ورتالىعىن اشۋ؛ جانە جاھاندىق دەنساۋلىق داعدارىسىنىڭ سالدارىن وتەيتىن كۋرورتتىق تۋريزمگە باعىتتالعان باعىتتار جەلىسىن دامىتۋ.
2010 جىلدان باستاپ Air Astana جوعارى ساپالى قىزمەتى ءۇشىن Skytrax، APEX جانە Tripadvisor حالىقارالىق سىيلىقتارىمەن، سونداي-اق 2015 جىلى Air Transport World جاھاندىق نارىقتاعى كوشباسشىلىق سىيلىعىمەن بىرنەشە رەت ماراپاتتالدى.
"Air Astana 21 جىلدىق مەرەيتويىن مەرەكەلەۋگە لايىق. 6 000 ءوز ىسىنە ادال قىزمەتكەرلەرىمىزدىڭ ءارقايسىسىنا جانە ميلليونداعان كليەنتتەرگە شىن جۇرەكتەن العىسىمدى بىلدىرەمىن. ولاردىڭ قولداۋى سوڭعى جىلدارداعى بارلىق قيىندىقتاردى ەڭسەرۋگە جانە 2023 جىلى دامۋدى سەنىمدى تۇردە جالعاستىرۋعا مۇمكىندىك بەردى" ، - دەپ اتاپ ءوتتى Air Astana كومپانيالار توبىنىڭ پرەزيدەنتى پيتەر فوستەر.
Air Astana اۋە پاركىن باتىستا وندىرىلگەن زاماناۋي اۋە كەمەلەرىمەن دامىتۋدى جالعاستىرۋدا. 2022-2023 جىلدارى كومپانيالار توبى 8 اۋە كەمەسىن الدى، ال وسى جىلدىڭ سوڭىنا دەيىن تاعى 7 ۇشاقتى كۇتۋدە، سونىمەن قاتار 2024 -2026 جىلدار ارالىعىندا تاعى 13 ۇشاقتى جەتكىزۋ تۋرالى كەلىسىمشارت جاسادى. 2025 جىلدان باستاپ اۋەكومپانيا 3 Boeing 787 اۋە لاينەرىن الۋدى جوسپارلاپ وتىر. بۇل اۋەكومپانياعا ءبىرقاتار ۇزاق قاشىقتىققا، سونىڭ ىشىندە اقش-قا ۇشۋدى باستاۋعا مۇمكىندىك بەرەتىن جاڭا كەڭ فيۋزەلياجدى ۇشاق.
جاقىن ارادا Air Astana يزرايلدەگى تەل-اۆيۆكە جانە ساۋد ارابياسىنداعى دجيدداعا جاڭا تىكەلەي رەيستەردى ىسكە قوسۋدى، سونداي-اق قولدانىستاعى مارشرۋتتارداعى ۇشۋ جيىلىگىن ارتتىرۋدى جوسپارلاپ وتىر. اۋەكومپانيا اۋەپارك پەن مارشرۋتتىق جەلىنى دامىتۋ 2023 جىلدىڭ سوڭىنا دەيىن توپتىڭ جولاۋشىلار اعىنىن 8،5 ميلليونعا دەيىن ارتتىرۋعا مۇمكىندىك بەرەدى دەپ كۇتىلۋدە.
21ء-شى تۋعان كۇنىن اتاپ ءوتىپ جاتقان "Air Astana" 15-21 مامىر ارالىعىندا سايتتا، ءموبيلدى قوسىمشادا، "Air Astana" نەمەسە Call Centr ساتۋ كەڭسەلەرى ارقىلى بيلەت العان جولاۋشىلار اراسىندا اۆيابيلەتتەر مەن باسقا دا باعالى سىيلىقتار ۇتىس ويىنىن وتكىزەدى. ۇتىس ويىنىنا قاتىسۋ ەرەجەلەرى مەن شارتتارى اۋەكومپانيانىڭ سايتىندا جاريالانعان.