Air Astana اۋە كومپانياسىنىڭ ۇشاعى اقاۋعا بايلانىستى اقتاۋ اۋەجايىنا شۇعىل تۇردە قونۋعا ءماجبۇر بولدى، دەپ حابارلايدى aqshamnews.kz.
كومپانيا باسپا ءسوز قىزمەتى بۇل جاعدايعا بايلانىستى تۇسىنىك بەردى. ونداعى مالىمەتكە سۇيەنسەك، 8 قاڭتاردا الماتى - انتاليا باعىتى بويىنشا كس915 رەيسىن ورىندايتىن Airbus A321 ۇشاعى اۋەجايدان جەرگىلىكتى ۋاقىت بويىنشا 08:35-تە ۇشىپ كەتكەن. الايدا تەحنيكالىق سەبەپپەن ۇشاق اقتاۋ اۋەجايىنا شتاتتىق رەجيمدە قونعان. بۇعان ورتالىق باكتىڭ وتىن جۇيەسىنىڭ ساقتاندىرعىش كلاپانىنىڭ اقاۋلىعى سەبەپ بولعان.
رەيس الماتىدان قوسالقى بولىكتى جەتكىزۋ قاجەتتىلىگىنە بايلانىستى 9 قاڭتاردا ساعات 09: 20-عا اۋىستىرىلدى. جولاۋشىلارعا تاماق بەرىلىپ، قوناق ۇيگە ورنالاستىرىلدى. وسىنداي شارالار انتالياداعى جولاۋشىلارعا قاتىستى دا قولدانىلۋدا،-دەلىنگەن مالىمەتتە.