تۇركىستان وبلىسىندا تۇراتىن 14 جاسار جەتكىنشەك اۋەلەتىپ دوپ تەبۋدەن الەم رەكوردىن جاڭارتۋى مۇمكىن.
قازىعۇرتتىق مەيرامبەك سىلەۋسىنوۆ دوپتى جەرگە تۇسىرمەي، 7994 رەت تەپتى، دەپ حابارلايدى aqshamnews.kz 24.kz-كە سىلتەمە جاساپ.
سپورت ساراپشىلارى بۇل الەمدەگى ەڭ جوعارى كورسەتكىش دەپ وتىر.
اۋەلەتە دوپ تەبۋدەن ورداباسى فۋتبول اكادەمياسى ۇيىمداستىرعان سايىستا مەيرامبەك ءوزىنىڭ عانا ەمەس، الەمدەگى اياق دوپ شەبەرلەرىنىڭ رەكوردىن جاڭارتتى. بۇعان دەيىن اۋەلەتە دوپ تەبۋدەن ەڭ ۇزدىك كورسەتكىش برزيليالىق ايگىلى فۋتبولشى رونالدينوعا تيەسىلى بولعان. ول دوپتى جەرگى تۇسىرمەي 7432 رەت تەپكەن. ال مەيرامبەكتىڭ كورسەتكىشى 7994.
مەيرامبەك تويلىبايەۆ، وقۋشى:
- مەن جارىسقا 1 اپتاداي دايىندالدىم. ازاندا ساباققا كەتەمىن تۇستە كەلەم. كۇندە 2-3 مىڭ ۇرىپ تۇرامىن. جارىسقا بارىپ قورقىنىش ەشقانداي سەزىم بولعان جوق. 8 مىڭدى ىستەيمىن دەدىم، كەيىن باس جۇلدەنى الدىم.
مەيرامبەكتىڭ الا دوپتى سەرىك ەتكەنىنە 3 جىلدان استى. ونى سپورتتىڭ بۇل تۇرىنە اعاسى بەكارىس باۋلىعان. ول ءىنىسىنىڭ ەرەكشە قابىلەتكە يە ەكەنىن بايقاپ كۇن سايىن بوس ۋاقىتىندا توپ تەبۋدى ۇيرەتكەن.
بەكارىس تويلىبايەۆ، مەيرامبەكتىڭ اعاسى:
مەيرامبەك ءوزى جاستايىنان دوپقا قۇمار بولىپ ويناپ ءوستى. بىرتە-بىرتە قىزىعۋشىلىعىن بايقادىم. بايقاعاننان كەيىن ارمەن قاراي قىزىعۋشىلىعىن وياتۋ ماقساتىندا پروفەسسيونالنىي دوپتار الىپ دايىندىعىن كۇشەيتە باستادىق.
مەيرامبەكتىڭ رەكوردى ازىرگە قۇجات جۇزىندە بەكىتىلمەگەن. ءبىراق ونىڭ 3 ساعاتقا جۋىق دوپتى تۇسىرمەي تەپكەنىن دالەلدەيتىن ۆيدەولارى بار. ەگەر رەكوردتار كىتابىنا ەنگىزۋ ءۇشىن قايتا دوپ تەپتىرسە وعان دا دايىن. ال وقۋشىنىڭ وسى كورسەتكىشىنە قاراپ ونى ۇلكەن فۋتبول كلۋبتارى شاقىرتا باستاعان.
ارمان ءپىرمانوۆ، ورداباسى فۋتبول اكادەمياسىنىڭ وكىلى:
ءبىزدىڭ ويىمىز ءقازىر بۇل بالانى اۋداننان الىپ كەلۋ كەرەك. اعاسىنا دا ايتتىق. ەندى اعاسى جاقىندا قالاعا كوشىپ كەلىپ وسى جاققا ءىنىسىن الىپ كەلەدى شىمكەنتكە. سودان كەيىن ءبىز اكادەمياعا الىپ بارامىز. ول جەردەن جاقسى ويناپ كەتىپ جاتسا ءوزىمىزدىڭ ورداباسىعا الىپ كەتەمىز. ارى قاراي جاتاتىن جەرىن دە، تاماعىن دا بارلىعىن ورداباسى، وڭتۇستىك اكادەميا تولەيدى.
8-سىنىپتا وقيتىن مەيرامبەك بولاشاقتا قازاقستان ۇلتتىق قۇراماسى ساپىندا ويناۋدى ارماندايدى. سونىمەن قاتار اۋەلەتە دوپ تەبۋدەن ءوز رەكوردىن 10 مىڭعا جەتكىزىپ، الەمدە ءبىرىنشى بولۋدى قالايدى.