ءورت قاۋىپسىزدىگى ەرەجەلەرىن ساقتاۋ قاجەتتىگىن ايتتى.
الماتى قالاسىنىڭ تجد مەمەلەكەتتىك ءورت باقىلاۋ باسقارماسى باسشىسىنىڭ ورىنباسارى، ازاماتتىق قورعانىس پودپولكوۆنيگى ەربولات تورتقارايەۆ وكق الاڭىندا ءسوز سويلەي وتىرىپ، بيىلعى جىلى تابيعي گازبەن ۋلانۋدىڭ 9 جاعدايى تىركەلگەنىن، 28 ادامنىڭ زارداپ شەككەنىن ايتتى، دەپ حابارلايدى Almaty-akshamy.kz.
تجد سپيكەرى قوعامدىق تاماقتانۋ نىساندارى يەلەرى مەن قىزمەتكەرلەرى، جاتاقحانا، جەكە ءۇي تۇرعىندارى اراسىندا تۇرمىستىق گاز قۇيىلعان باللونداردى قولدانۋ ەرەجەلەرى مەن گاز شىعۋ جاعدايىندا ىستەلەتىن ىس-ارەكەتتەردى ءتۇسىندىرۋ جۇمىستارى كۇندەلىكتى جۇرگىزىلىپ وتىراتىنىن اتاپ ءوتتى.
«كۇننىڭ سۋۋىمەن ءورت جانە تابيعي گازدان ۋلانۋ وقيعالارى جيىلەي تۇسەتىنىن ايتا كەتۋ كەرەك. جۇرگىزىلىپ جاتقان پروفيلاكتيكالىق شارالارعا قاراماستان، بۇل، وكىنىشكە وراي، جىلدان جىلعا قايتالانىپ كەلەدى. جىل باسىنان بەرى تابيعي گازدان ۋلانۋ بويىنشا بارلىعى 9 وقيعا تىركەلدى. وتكەن جىلدىڭ وسى كەزەڭىمەن سالىستىرعاندا 47%-عا (2021 ج. – 17) تومەندەگەنى بايقالادى. تابيعي گازدان ۋلانۋدان 28 ادام زارداپ شەككەن، سونىمەن قاتار 2022-2023 جىلىتۋ ماۋسىمىندا تۇرعىن ءۇي سەكتورىندا 7 ادام كوگىلدىر وتىننان ۋلانعان»، - دەدى ە.تورتقارايەۆ.
قۇتقارۋشى گاز باللوندارىن دۇرىس ساقتاماۋ جانە ونى دۇرىس پايدالانباۋدىڭ سالدارى اپاتتار مەن قايعىلى وقيعالارعا اكەپ سوقتىراتىنىن اتاپ ءوتتى. ول سونىمەن قاتار جاقىندا عانا بولعان وقيعالاردى مىسالعا كەلتىردى.
وسى جىلدىڭ 2 قازانىندا 12 ساعات 18 مينۋتتا الماتى قالاسى مەدەۋ اۋدانىنىڭ 2ء-شى كوسمودەميانسكايا كوشەسىندە ورنالاسقان ءۇي مۇرجاسىنىڭ (مۇرجا بولشەكتەلگەن) دۇرىس ىستەمەۋى سالدارىنان جەكەمەنشىك 2 قاباتتى تۇرعىن ءۇيدىڭ جەرتولەسىندە 5 ادام تابيعي گازبەن ۋلانعان، ونىڭ ەكەۋى جاس بالا. زارداپ شەككەندەردىڭ بارلىعى مەديسينالىق مەكەمەلەرگە جاتقىزىلدى.
1 جەلتوقسان كۇنى ساعات 16:10-دا تۇركسىب اۋدانىنىڭ چەحوۆ كوشەسىندەگى ءبىر پاتەردە گاز جابدىقتارىن پايدالانۋ تالاپتارى بۇزىلۋى سەبەبىنەن ەكى ادام گازبەن ۋلانعان. زارداپ شەككەندەر اۋرۋحاناعا جەتكىزىلىپ، تەكسەرۋدەن كەيىن ۇيلەرىنە قايتارىلعان. پروپان گازى قۇيىلعان گاز جىلىتقىشىن ءۇيدى جىلىتۋ ءۇشىن پايدالانعان سەبەپتى ۋلانعان.
«بارلىق ۋلانۋ وقيعالارى جىلىتۋ قۇرىلعىلارىن پايدالانۋ كەزىندە تۇرعىنداردىڭ سالعىرتتىعى ناتيجەسىندە ورىن الادى. مۇنداي وقيعالار كوبىنەسە گاز جابدىقتارىن دۇرىس پايدالانباۋ، گازدىڭ شىعۋى، رەزەڭكە شلانگتىڭ توزۋى، گاز باللوندارىن دۇرىس ساقتاماۋ سەبەبىنەن ورىن الىپ جاتادى. تۇرعىندار مەزگىلىندە تازالانباعان، مۇرجالارىنىڭ تارتۋى جەتكىلىكسىز، جاسالۋى، شىققان جەرى كۇماندى گاز جابدىقتارىن پايدالانادى»، - دەدى پودپولكوۆنيك.
تجد وكىلى ەربولات تورتقارايەۆ بيىلعى جىلى تۇرعىن ءۇي سەكتورىندا 350 ءورت وقيعاسى تىركەلىپ، زارداپ شەككەندەردىڭ سانى 29 ادام ەكەنىن ايتتى.
توتەنشە جاعدايلاردى، ادام ءولىمىن، ونىڭ جاراقاتتانۋىن بولدىرماۋ جانە ءورتتىڭ الدىن الۋ ءۇشىن ءورت قاۋىپسىزدىگى ەرەجەلەرىن ساقتاۋ قاجەت، اتاپ ايتقاندا:
- گاز قۇرالدارىن پايدالانۋ كەزىندە قاۋىپسىزدىك شارالارىن ساقتاۋ؛
- جىلىتۋ پەشتەرى مەن گاز قۇرىلعىلارىنىڭ جانىنا جيھاز جانە باسقا دا جانعىش زاتتاردى قويۋعا، كيىمدەر مەن اعاش وتىندى كەپتىرۋگە بولمايدى؛
- اقاۋى بار ەلەكتر روزەتكالاردى، ەلەكتر اجىراتقىشتار مەن ەلەكتر قۇرىلعىلارىن قولدانۋعا بولمايدى؛
- ەلەكتر پليتالارىن، ۇتىكتەر، ەلەكتر شاينەكتەر جانە كەروسيندى قۇرىلعىلاردى وتقا ءتوزىمدى ستەندتەرگە ورنالاستىرۋ قاجەت؛
پەش قۇرىلىمدارىنداعى سىنىقتار مەن جارىقشاقتاردى سىلاپ، مۇرجالاردى كۇيەدەن تازارتۋ كەرەك؛
- ءاربىر پەش اۋزىنداعى جانعىش ەدەنگە ولشەمى كەمىندە 50ح70 سم بولاتىن تەمىر قاڭىلتىر ورناتۋ كەرەك.
- ءبىر جەلىگە بىرنەشە ەلەكتر قۇرىلعىلارىن قوسۋعا جول بەرمەۋ كەرەك، بۇل ەلەكتر جەلىسىنىڭ شامادان تىس جۇكتەلۋىنە اكەلەدى؛
- قولدان جاسالعان ەلەكتر جىلىتقىشتارىن قولدانباڭىز.