2024 جىلى Air Astana كومپانيالار توبى ءوز ستراتەگياسىن ءساتتى جۇزەگە اسىرىپ، تابىستىلىقتى ساقتاي وتىرىپ، قارقىندى وسىمگە قول جەتكىزدى. اۋە تاسىمالداۋشىسى جىل ىشىندە 9 ميلليون جولاۋشى تاسىمالداپ، 2023 جىلعى كورسەتكىشتەن شامامەن 1 ميلليونعا ارتىق ناتيجە كورسەتتى. بۇل تۋرالى Aqshamnews.kz سايتى حابارلايدى.
بۇل جەتىستىك Air Astana مەن ونىڭ بيۋدجەتتىك برەندى FlyArystan سىيىمدىلىقتى ۇلعايتۋى مەن جوعارى سۇرانىستىڭ ايقىن دالەلى. كومپانيا تەك جولاۋشىلار سانى بويىنشا عانا ەمەس، قارجىلىق كورسەتكىشتەر بويىنشا دا وڭ ناتيجە كورسەتتى.
كومپانيانىڭ كىرىسى مەن باسقا دا تۇسىمدەرى 12،4%-عا ءوسىپ، 1 308 ميلليون اقش دوللارىن قۇرادى. سالىستىرمالى تۇردە، 2023 جىلعى كورسەتكىش 1 164 ميلليون اقش دوللارىن قۇراعان بولاتىن. بۇل ءوسىم جولاۋشىلار سانىنىڭ ارتۋى مەن ءتيىمدى باسقارۋ ستراتەگياسىنىڭ ناتيجەسىندە ورىن الدى.
كومپانيانىڭ ديرەكتورلار كەڭەسى اكسيونەرلەرگە ديۆيدەند تولەۋدى ۇسىندى. جوسپارعا سايكەس:
- ءبىر جاي اكسياعا – 53،7 تەڭگە
- ءبىر جدق-عا (ءتورت اكسياعا تەڭ) – 214،8 تەڭگە
بۇل ۇسىنىس 2025 جىلدىڭ 31 مامىرىنان كەشىكتىرمەي وتەتىن اكسيونەرلەردىڭ جىلدىق جالپى جينالىسىندا بەكىتۋگە ۇسىنىلادى.
Air Astana كومپانيالار توبىنىڭ باس اتقارۋشى ديرەكتورى پيتەر فوستەر 2024 جىلدىڭ جەتىستىكتەرىنە جوعارى باعا بەردى:
"ءبىز اشىق كومپانيا رەتىندە العاشقى جىلىمىزدا قارقىندى وسىمگە قول جەتكىزدىك. سالاداعى سىيىمدىلىق پەن شىعىندارعا قاتىستى ماسەلەلەرگە قاراماستان، IPO كەزىندە بەرگەن ۋادەلەرىمىزدى ورىندادىق. جاڭا قارجى جىلىندا دا جوعارى سۇرانىس پەن ۇلعايعان قۋاتتىلىقتىڭ ارقاسىندا ءوسۋدى جالعاستىرۋعا دايىنبىز."
Air Astana 2025 جىلى دا ەكى برەند بويىنشا تۇراقتى ءوسىمدى ساقتاۋعا نيەتتى. كومپانيا جولاۋشىلار تاسىمالىن ارتتىرۋ، اۋە كەمەلەرىن جاڭارتۋ جانە جاڭا باعىتتاردى ىسكە قوسۋ ارقىلى باسەكەگە قابىلەتتىلىگىن نىعايتۋدى جوسپارلاپ وتىر.
2024 جىل Air Astana ءۇشىن ايتارلىقتاي تابىستى جىل بولدى. جولاۋشىلار سانىنىڭ ارتۋى، قارجىلىق كورسەتكىشتەردىڭ ءوسۋى جانە اكسيونەرلەرگە ۇسىنىلعان ديۆيدەندتەر – كومپانيانىڭ تۇراقتى دامۋ باعىتىن كورسەتەدى. الداعى جىلى دا Air Astana قازاقستاننىڭ جانە حالىقارالىق اۆياسيا نارىعىنىڭ كوشباسشىلارىنىڭ ءبىرى رەتىندە ءوز پوزيسياسىن نىعايتا تۇسپەك.