12 – مامىر حالىقارالىق مەيىربيكەلەر كۇنى.
قازىرگى تاڭدا ەلىمىزدىڭ دەنساۋلىق ساقتاۋ سالاسىندا 187 مىڭنان استام ورتا بۋىندى مەديسينا قىزمەتكەرلەرى قىزمەت اتقارادى، دەپ حابارلايدى Almaty-akshamy.kz.
بۇل كۇننىڭ مەيىربيكەلىك قىزمەتتىڭ العاشقى ۇيىمداستىرۋشىلارىنىڭ ءبىرى بولعان اعىلشىندىق مەيىربيكە فلورەنس نايتينگەلدىڭ ەسىمىمەن تىكەلەي بايلانىستى ەكەنىن، ونىڭ بۇگىندە كاسىپتىك مەرەكەلەردىڭ قاتارىنداعى ەڭ بەدەلدى مەرەكە ەكەنىن دە جاقسى بىلەمىز. بۇگىنگى تاڭدا قازاقستاندا 187 مىڭنان استام ورتا بۋىندى مەديسينا قىزمەتكەرلەرى قىزمەت اتقارادى. سونىڭ قاتارىندا الماتى قالاسىنىڭ الاتاۋ اۋدانى، «زەردەلى» ىقشاماۋدانىندا ورنالاسقان № 29 قالالىق ەمحانانىڭ حالىق دەنساۋلىعىن جاقسارتۋ ىسىندە جان ايانباي قىزمەت اتقارىپ جۇرگەن 165 مەيىربيكەسى دە بار. ولار دا وزدەرىنىڭ كاسىپتىك مەرەكەلەرىن سالتاناتتى تۇردە اتاپ ءوتىپ، اۋدان تۇرعىندارىنىڭ العىسىنا بولەندى.
ەكى جىل قاتارىنان كاسىبي بىلىكتىلىك بايقاۋىندا ءبىرىنشى جانە ەكىنشى ورىندى يەمدەنگەن №29 قالالىق ەمحانا 53 مىڭعا جۋىق قالا تۇرعىندارىنا مەديسينالىق قىزمەت كورسەتەدى. وسىنشا تۇرعىننىڭ دەنساۋلىعىن باقىلاپ، ولاردىڭ سىرقاتىنان ايىعىپ كەتۋىنە مەيىربيكەلەردىڭ قوسىپ وتىرعان ۇلەسى زور. ەمحاناداعى 10 «دەنساۋلىق مەكتەبىن» مەيىربيكەلەردىڭ جۇرگىزەتىندىگى دە مەيىربيكەلەردىڭ ءوز جۇمىستارىن دەربەس ۇيىمداستىرا الاتىندىقتارىنىڭ جارقىن مىسالى بولسا كەرەك. پاندەميا كەزىندە بارلىق توتەنشە جاعدايعا توتەپ بەرە الاتىندىقتارىن ىستەرىمەن دالەلدەي بىلگەن ەمحانا دارىگەرلەرىمەن قاتار، مەيىربيكەلەرگە دە ۇلكەن جاۋاپكەرشىلىك جۇكتەلگەنى بەلگىلى. سول ەڭبەكتەرىنىڭ ناتيجەسىندە ەمحانانىڭ 15 قىزمەتكەرىنىڭ ەسىمدەرى قالاداعى كورنەكتى ورىنداردا ورنالاسقان العىس تاقتاسىنا جازىلىپ ءىلىندى. ال ەمحاناعا كەلگەن ءاربىر ناۋقاس باقىت وتەپوۆا، نۇرگۇل تيكەمبايەۆا، توتى ساعىندىقوۆا، ءمولدىر كالياكوۆا، اسەل وتەعۇلوۆا، روزگۇل ساكييەۆا سەكىلدى قولدارى شيپالى، ەمدەرى داۋا مەيىربيكەلەر مەن ورتا بۋىندى مەديسينا قىزمەتكەرلەرىنىڭ قىزمەتىنە ءدان ريزا.
«ءقازىر دەنساۋلىق ساقتاۋ سالاسىندا مەيىربيكەلەرگە ۇلكەن جاۋاپكەرشىلىك جۇكتەلىپ، ورتا بۋىندى مەديسينا قىزمەتكەرلەرىن دايىنداۋدىڭ جاڭا مودەلدەرى ەنگىزىلۋدە. بۇرىن ءبىز مەيىربيكەلەرگە دارىگەرلەردىڭ تاعايىنداۋلارىن ورىنداۋشى رەتىندە عانا قاراپ كەلسەك، بۇگىندە ولار دارىگەرلەردىڭ تەڭ سەرىكتەستەرىنە اينالىپ، دارىگەرلەردەن دەربەس قابىلداۋدى، ديناميكالىق باقىلاۋدى، اقىل كەڭەس بەرەتىن، اۋرۋلاردى باسقارۋ باعدارلماسى شەڭبەرىندە وقىتۋ جانە پاتروناجدى قىزمەتتى جۇزەگە اسىراتىن، سكرينينگتىك تەكسەرۋلەردى، ۆاكسيناسيالاۋ جانە باسقا دا ءبىرقاتار دياگنوستيكالىق ەم-شارالاردى جۇزەگە اسىرۋ مۇمكىندىگىنە يە بولىپ وتىر. كىشى مەيىربيكەدەن باستاپ، مەيىربيكە ءىسى بويىنشا رھد دوكتورىنا دەيىن مەيىربيكە ءىسى ماماندىعىن دايارلاۋدىڭ كوپدەڭگەيلى جۇيەسى ەنگىزىلدى. جۇمىس ىستەيتىن مەيىربيكەلەر ءۇشىن جەدەلتەتىلگەن جانە يكەمدى دايارلاۋ باعدارلمالارى بويىنشا جوعارى جانە ورتا بىلىمنەن كەيىنگى مەدبيكەلىك ءبىلىم الۋعا مۇمكىندىك بەرەتىن اكادەميالىق جانە قولدانبالى باكالاۆرياتتىڭ بىرىكتىرىلگەن باعدارلاماسىنىڭ، «مەدبيكە ىسىندە ءبىلىم، تاجىريبە جانە عىلىمنىڭ ءۇشتۇعىرلىعى» جول كارتاسىنىڭ قابىلدانۋى، ولاردى دەنساۋلىق ساقتاۋ ساياساتىن ايقىنداۋ ماسەلەلەرىنە تارتۋ، مەيىربيكەلەر اراسىندا كوشباسشىلىق الەۋەتتى دامىتۋ دا مەيىربيكە ءىسىنىڭ مارتەبەسىن ارتتىرا تۇسۋدە. سوندىقتان مەن حالىقارالىق مەيىربيكەلەر كۇنىندە ەمحانانىڭ بارلىق مەيىربيكەلەرى مەن قالامىزدىڭ دەنساۋلىق ساقتاۋ سالاسىندا قىزمەت اتقارىپ جۇرگەن بارلىق ورتا بۋىندى مەديسينا قىزمەتكەرلەرىن دە مەرەكەلەرىمەن قۇتتىقتايمىن. ءبىز ءۇشىن ەڭ ۇلكەن ماراپات– ەمدەلۋشىلەردىڭ العىسى. سول كوپتىڭ العىسىنا بولەنە بەرىڭىزدەر»،- دەيدى الماتى قالالىق №29 ەمحانانىڭ باس مەيىربيكەسى، جوعارى ساناتتى مەيىربيكە ەلميرا ايتقادىر قىزى ابييەۆا.
مەرەكەلەرىڭىز قۇتتى بولسىن، مەيىرىمدى مەيىرگەرلەر!