قازاقستاندا قازان ايىنىڭ العاشقى جەكسەنبىسىندە ۇستازداردىڭ كاسىبي مەرەكەسى اتالىپ وتەدى.
ءبىلىم جانە عىلىم مينيسترلىگى ۇستازدار كۇن قارساڭىندا «ۇستازىڭدى قۇتتىقتا» (ۇستازىڭدىقۇتتىقتا #پوزدراۆسۆوەگوۋچيتەليا)، اكسياسىن ىسكە قوستى، دەپ حابارلايدى Almaty-akshamy.kz.
بۇل اكسيانىڭ باستاماشىسى ءبىلىم جانە عىلىم ءمينيسترى اسحات ايماعامبەتوۆ Instagram-داعى ءوز پاراقشاسىندا ۇستازداردى قۇتتىقتاۋعا، ولاردىڭ ماڭىزدى دا ەلەۋلى جۇمىستارىنا نازار اۋدارۋعا شاقىرىپ پوست ارنادى.
«ءار ادامنىڭ ومىرىندە ونىڭ العاشقى ۇستازى ەرەكشە ورىن الادى. العاشقى ۇستازدىڭ بالا ومىرىندەگى ءرولى، اسىرەسە، بۇلدىرشىندەر باستاۋىش سىنىپتان 5-سىنىپقا اۋىسقان كەزدە بايقالادى. مەنىڭ العاشقى ۇستازىم ليۋبوۆ ۆالەنتينوۆنا گومزەليەۆا بولدى. ول ادامنىڭ ادەمى جازۋى مەن اسەم كۇلكىسى ءالى كۇنگە دەيىن ەسىمدە. باستاۋىش سىنىپتاردا وقىپ جۇرگەنىمىزدە ءوزىمىزدى ەرەكشە سەزىندىك، ءمۇعالىمنىڭ وقۋشىلارعا دەگەن قامقورلىعى مەن سۇيىسپەنشىلىگىن كورىپ وستىك. سىنىپتاعى ءار وقۋشى ءمۇعالىمنىڭ قولداۋى مەن ماحابباتىن سەزىپ، ءوزىن ەرەكشەمىن دەپ ويلاۋى — بۇل پەداگوگ بويىنداعى ەرەكشە ءبىر قاسيەت بولار»، - دەدى ايماعامبەتوۆ.
سونىمەن قاتار مينيستر تاريح ءپانىنىڭ مۇعالىمدەرى مارات يسابەك ۇلى مەن تىنىشتىق نۇربەك قىزىنىڭ ساباقتارى كەزىندەگى قىزىقتى ساتتەرىن ەسكە الدى.
«تاريح ءپانىنىڭ مۇعالىمدەرى مارات يسابەك ۇلى مەن تىنىشتىق نۇربەك قىزىنىڭ ساباقتارى وتە قىزىقتى وتەتىن. شەتەل ءتىلى ءمۇعالىمى اللا ۆاسيليەۆنانىڭ ەسىمى جادىمدا ساقتالىپ قالدى. سونداي-اق ورىس ءتىلى ءپانىنىڭ ءمۇعالىمى ليۋبوۆ يۆانوۆنا دا ەسىمدە. ەرەكشە قاتال جانە تالاپشىل ءمۇعالىم ەدى. ءمۇعالىمىمىزدىڭ «قاناتتى سوزدەرى» بۇگىن ءبىزدىڭ دە سوزدىك قورىمىزدان تابىلىپ جاتادى. جوعارى وقۋ ورنىندا وقىپ جۇرگەن كەزدەگى وقىتۋشىلارىم دا كەرەمەت جاندار بولدى. ولار ستۋدەنتتەردىڭ جەكە تۇلعا بولىپ قالىپتاسۋلارىنا ايتارلىقتاي اسەر ەتتى. قازان ايىنىڭ ءبىرىنشى جەكسەنبىسىندە ەلىمىزدە مۇعالىمدەر كۇنى اتاپ وتىلەدى. كاسىبي مەرەكەگە وراي ءبىلىم جانە عىلىم مينيسترلىگى #ۇستازىڭدىقۇتتىقتا اكسياسىن باستادى. بارشاڭىزدى ۇستازدارىڭىزدى قۇتتىقتاپ، جىلى لەبىزدەرىڭىزدى بىلدىرۋگە شاقىرامىن»، - دەدى ول.