ايماعامبەتوۆ ءماجىلىس دەپۋتاتتىعىنا ۇسىنىلدى

Amanat پارتياسى ءماجىلىس سايلاۋىنا بارلىعى 119 كانديدات ۇسىندى.

Amanat پارتياسىنىڭ كەزەكتەن تىس سەزىندە ءماجىلىس دەپۋتاتتىعىنا كانديداتتاردىڭ ءتىزىمى بەكىتىلدى، دەپ حابارلايدى Almaty-akshamy.kz

ۇمىتكەرلەر اراسىندا بۇرىنعى وقۋ-اعارتۋ ءمينيسترى اسحات ايماعامبەتوۆ جانە تانىمال ايتىسكەر رينات زايىتوۆ بار.

Amanat پارتياسى ءماجىلىس سايلاۋىنا بارلىعى 119 كانديدات ۇسىندى. پارتيالىق ءتىزىم بويىنشا 90، ال ءبىر مانداتتىق وكرۋگ بويىنشا 29 ادام ەنگىزىلىپ وتىر.

الداعى ءماجىلىس سايلاۋىنا پارتيالىق ءتىزىم بويىنشا تۇسەتىن كانديداتتاردىڭ اراسىندا بۇرىنعى وقۋ-اعارتۋ ءمينيسترى اسحات ايماعامبەتوۆ، تاننىمال ايتىسكەر اقىن رينات زايىتوۆ، جۋرناليست نارتاي ارالباي ۇلى، "قازاقستان كۆن وداعى" قوعامدىق بىرلەستىگىنىڭ پرەزيدەنتى ەسەن ەلەۋكەن، بوكسشى فيرۋزا ءشارىپوۆا بار.

سونداي-اق، ءماجىلىستى باسقارعان، Amanat پارتياسىنىڭ ءتوراعاسى ەرلان قوشانوۆ تا الداعى سايلاۋدا دەپۋتات مانداتىنا تالاسادى.

Amanat پارتياسىنىڭ كەزەكتەن تىس سەزىندە سايلاۋعا قاتىساتىن ۇمىتكەرلەر ءتىزىمى ءبىراۋىزدان بەكىتىلدى.

ال ءماسليحات دەپۋتاتتىعىنا پارتيادان 3821 كانديدات ۇسىنىلدى. ءماجىلىس جانە ءماسليحات دەپۋتاتتارىنىڭ كەزەكتەن تىس سايلاۋى 19 ناۋرىزدا وتەدى.