ايجان ەسماعامبەتوۆا: ەپيدەميولوگيالىق جاعداي جاقسارىپ كەلەدى

امبۋلاتوريالىق جاعدايدا ەم الاتىندار سانى 4 ەسە قىسقارعان.

قازاقستاننىڭ دەنساۋلىق ساقتاۋ ۆيسە-مينيسترى — قازاقستان رەسپۋبليكاسىنىڭ باس مەملەكەتتىك سانيتار دارىگەرى ايجان ەسماعامبەتوۆا ەلدەگى ەپيدەميولوگيالىق جاعدايدى باياندادى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«بۇگىن ەلىمىزدە كوروناۆيرۋس ينفەكسياسى بويىنشا ەپيدەميولوگيالىق جاعداي جاقسارىپ كەلەدى. سوڭعى ەكى اپتامەن سالىستىرساق، سىرقاتتانۋ دەڭگەيى 4،7-گە تومەندەدى. ال ستاسيوناردا ەم الاتىن ناۋقاستار سانى ەكى ەسە ازايدى. امبۋلاتوريالىق جاعدايدا ەم الاتىندار سانى 4 ەسە قىسقاردى»، - دەدى ايجان ەسماعامبەتوۆا ق ر دسم ۇيىمداستىرعان ونلاين دارىستە.

سپيكەردىڭ ايتۋىنشا، ەلىمىزدە ۆاكسينالاۋ جانەن ريەۆاكسينالاۋ جۇمىسى جالعاسىپ جاتىر.

«بۇگىنگى كۇنى قازاقستاندا كوروناۆيرۋسقا قارسى ۆاكسينانىڭ ءبىرىنشى كومپونەنتىن 10 ميلليوننان استام قازاقستاندىق الدى. بۇگىنگى كۇنى ەگىلۋگە ءتيىستى ەرەسەك تۇرعىنداردى ۆاكسينامەن قامتۋ 82 پايىزدى، جالپى حالىقتىڭ 53 پايىزىن قۇرادى. 2 ملن 400 مىڭعا جۋىق ادام ريەۆاكسينالاۋدان ءوتتى. ول اقپان ايىندا ەگىلۋگە ءتيىستى حالىقتىڭ 52 پايىزىن قامتىدى. بۇل كورسەتكىش جامان ەمەس»، - دەدى باس مەملەكەتتىك سانيتار دارىگەر.