الداعى ۋاقىتتا «جىبەك جولى» اۆتوبازارى تولىعىمەن جاڭا فورماتتا ساۋدا جاساۋدى جوسپارلاپ وتىر، ال بازار اۋماعىنداعى زاڭسىز قۇرىلىستىڭ بارلىعى سۇرىلەدى.
تەمىردەن جاسالعان بۇل ساۋدا ورىندارىن كەزىندە رۇقسات الماي، قالا قۇرىلىسىنىڭ ەرەجەسىن ەلەمەي وتىرىپ سالعان. مەملەكەتتىك ورگاندار مەن بازار اكىمشىلىگىنىڭ وكىلدەرى «جىبەك جولى» بازارىن قالاي وزگەرتكەلى جاتقاندارىن ايتىپ بەردى.
«جىبەك جولى» بازارى – سايمان ساتىپ، اۆتوكولىككە قىزمەت كورسەتۋ ءۇشىن اشىلعان بازار بولاتىن. مۇندا شامامەن 2000 ساۋدا ورنى بار. بازار اۋماعىندا كولىك جوندەيتىن، سايمان ساتاتىن، كولىكتىڭ مايىن، سۋىن اۋىستىراتىن ساۋدا نۇكتەلەرى ورنالاسقان.
«بۇكىل بازاردى جابادى دەگەنى شىندىققا جاناسپايدى. ءبىز زاڭسىز سالىنعاندارىن عانا بۇزعالى جاتىرمىز. ءقازىردىڭ وزىندە كاسىپكەرلەرمەن بىرلەسىپ ولاردى زاڭداستىرۋ جاعىن قولعا الدىق. ەڭ باستىسى – ەشكىم جۇمىسسىز قالماۋى كەرەك. كولىك جوندەيتىن جاڭا ستانسيالاردىڭ جوباسىن جاساپ جاتىرمىز. ولار جاڭاشا جابدىقتالىپ، وندا ادامعا كەرەك دۇنيەنىڭ ءبارى بولادى. ءقازىر ءتيىستى ورگاندارعا جۇگىنىپ جاتىرمىز. بۇل وزگەرىستى تولىق ىسكە اسىرۋ ءۇشىن بىزگە شامامەن ءبىر جىلداي ۋاقىت كەرەك»، – دەيدى «جىبەك جولى» بازارىنىڭ ديرەكتورى ازامات قۇلماحانبەت.
بازار باسشىسىنىڭ ايتۋىنشا، وسى ۋاقىتتا ولار جاڭا جابدىق ورناتىپ، قاۋىپسىزدىك جۇيەسىن جەتىلدىرمەكشى. سۋ تارتىپ، سانيتارلىق توراپتار، كوتەرگىش قۇرىلعىلار مەن اجەتحانا سياقتى كەرەك-جاراق تۇگەل كىرمەك. ءسويتىپ، ساۋدا-ساتتىقتى زاڭناماعا ساي جۇرگىزۋى ءۇشىن بارلىق جاعداي جاساماق. «جىبەك جولى» بازارىنىڭ ەسكيزدىك جوباسى دايىن. ءقازىر بازار اۋماعىنىڭ 80%-ىن ءورت دابىلى ورناتىلعان جابىق پاۆيلوندار الىپ جاتىر.
ورنىنان ايىرىلعالى تۇرعان كاسىپكەرلەردىڭ ءوزى دە كاسىبىن زاڭداستىرعىسى كەلەتىنىن ايتادى. سولاردىڭ ءبىرى – اۆتوەلەكتريك سەرىكحان ەرماحان. سەرىكحاننىڭ بۇل بازاردا جۇمىس ىستەپ كەلە جاتقانىنا 10 جىلداي بولىپتى.
«جۇمىسسىز قالامىز با دەپ قورىقتىق. ءبىراق بۇگىنگى كەزدەسۋدەن كەيىن قولعا العالى جاتقان جوسپارىن كورىپ، كۇپتى كوڭىلىمىز ورنىنا ءتۇستى. ءبىز دە زاڭ اياسىندا جۇمىس ىستەگىمىز كەلەدى»، – دەيدى كاسىپكەر.
شارا بارىسىندا ايتىلعانداي، زاڭسىز سالىنعان 30 نىسان عانا بۇزىلادى. بۇدان بازاردىڭ جۇمىسى توقتاپ قالمايدى. زاڭمەن ساناسىپ سالىنعان ساۋدا ورىندارى ارى قاراي جۇمىس ىستەي بەرمەك.
«2023 جىلعى مامىردا جوسپاردان تىس تەكسەرۋ جۇرگىزىلىپ، سول كەزدە جالپى اۋماعى 5500 شارشى مەتر بولاتىن 30 زاڭسىز قۇرىلىس انىقتالدى. زاڭ بۇزۋشىلىقتى جويۋ جونىندە اكىمشىلىك شارالار قابىلداندى. ءبىراق بازاردىڭ يەسى بۇل نۇسقامانى ورىنداعان جوق. سوسىن ءبىز ولاردى ءسۇرۋ ءۇشىن قالانىڭ اكىمشىلىك سوتىنا تالاپ جولدادىق. بىلتىرعى جەلتوقساندا سوت تالابىمىزدى قاناعاتتاندىردى. 2024 جىلدىڭ ءساۋىر ايىندا سوت قۇرىلىس يەسىنىڭ شاعىمىن قاناعاتتاندىرماي، شەشىم وزگەرىسسىز قالدى. وسىعان بايلانىستى سوت شەشىمى زاڭدى كۇشىنە ەندى. زاڭسىز سالىنعان 30 نىساندى بۇزۋ جونىندەگى اتقارۋ پاراعى ادىلەت دەپارتامەنتىندە»، – دەيدى الاتاۋ جانە بوستاندىق اۋداندارى بويىنشا قالا قۇرىلىسىن باقىلاۋ باسقارماسىنىڭ ءبولىم باسشىسى الىبەك تولباسييەۆ.
بيلىك وكىلدەرى كەز كەلگەن قۇرىلىستى ەرەجەنى ەسكەرە وتىرىپ سالۋ كەرەك ەكەنىن ەسكەرتىپ وتىر. ءوز بەتىمەن سالىنعان قۇرىلىس قاتەر ءتوندىرىپ، زاڭداستىرۋعا دا كەلمەي، كەيىن يەسى ءوستىپ تەككە شىعىنداناتىنىن ايتادى.