قۇرلىقتىق دودادا قازاقستاندىق قىزدار ەكى التىن، ەكى قولا مەدال الدى
موڭعوليا استاناسى ۇلان-باتىردا ءوتىپ جاتقان ازيا چەمپيوناتىندا قازاقستاننىڭ ۇلتتىق قۇراماسى ايەلدەر كۇرەسىنەن جالپىكوماندالىق ەسەپتە ۇزدىك ۇشتىككە ەندى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ەل قۇراماسىنان 68 كەلىدە مادينا باقبەرگەنوۆا فينالدا قىرعىزستاندىق مەەريم جۋمانازاروۆانى جەڭىپ، التىننان القا تاقتى. ال 72 كەلىدە ءجاميلا باقبەرگەنوۆا فينالدا سۋميرە نييكۋرانى تىزە بۇكتىرىپ، جەڭىس تۇعىرىنا كوتەرىلدى.
سونداي-اق قازاقستاندىق سپورتشىلاردان جۇلدىز ەشىموۆا (53 كەلى) جانە گۇلمارال ەركەبايەۆا (76 كەلى) قولا جۇلدەگە قول سوزدى.
جالپىكوماندالىق ەسەپتە جاپونيا (7 التىن، 2 كۇمىس) جانە موڭعوليا (4 كۇمىس، 5 قولا) قۇراماسى العاشقى ەكى ورىنعا جايعاستى.
كۇرەس تۇرلەرىنەن (گرەك-ريم، ايەلدەر كۇرەسى، ەركىن كۇرەس) قۇرلىقتىق دوداعا ازيانىڭ 19 ەلىنەن سپورتشىلار كەلدى.