اقمولا وبلىسىندا بالالاردى مەكتەپتەرگە اۆتوبۋسپەن تاسىمالداۋ كەزىندە زاڭ بۇزۋشىلىقتارعا جول بەرگەن لاۋازىمدى تۇلعالار جاۋاپقا تارتىلدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
اقمولا وبلىسىنىڭ پروكۋراتۋراسى بالالاردى جالپى ءبىلىم بەرەتىن مەكتەپتەرگە اۆتوبۋستارمەن تاسىمالداۋ كەزىندە قاۋىپسىزدىك ەرەجەلەرىنىڭ ساقتالۋىنا تالداۋ جۇرگىزدى.
ۆەدومستۆونىڭ باسپا ءسوز قىزمەتىنەن ءمالىم ەتكەندەي، تەكسەرىس كەزىندە كولىك قۇرالدارىن باسقارۋ قۇقىعى جوق، سونداي-اق جۇرگىزۋشى كۋالىگىنىڭ ءتيىستى ساناتى بولماعان جۇرگىزۋشىلەردىڭ مەكتەپ اۆتوبۋستارىمەن بالالاردى تاسىمالداعانى انىقتالدى.
«بۇدان بولەك، كولىك قۇرالدارىنىڭ جۇرگىزۋشىلەرى مىندەتتى رەيس الدىندا جانە رەيستەن كەيىن مەديسينالىق تەكسەرۋدەن وتكىزىلىپ تۇرماعانى، مەكتەپ اۆتوبۋستارىن ءورت سوندىرگىشتەرمەن جانە العاشقى مەديسينالىق كومەك كورسەتۋ قوبديشالارىمەن جابدىقتالماعانى بەلگىلى بولدى. وسىلايشا، بالالاردىڭ ءومىرى مەن دەنساۋلىعىنا قاۋپ توندىرىلگەن»، - دەدى مەكەمەدەن.
پروكۋرورلاردىڭ اكتىلەرى بويىنشا وبلىس مەكتەپتەرى مەن اۋداندىق ءبىلىم بولىمدەرىنىڭ 53 لاۋازىمدى تۇلعاسى تارتىپتىك جاۋاپكەرشىلىككە جانە 10 اۆتوبۋس جۇرگىزۋشىسى اكىمشىلىك جازاعا تارتىلدى.
«كورسەتىلگەن سالادا انىقتالعان زاڭ بۇزۋشىلىقتار جويىلدى، مەكتەپ اۆتوبۋستارىنىڭ جۇرگىزۋشىلەرىنە جانە كولىك قۇرالدارىنا قويىلاتىن تالاپتار نورماعا سايكەس كەلتىرىلدى»، - دەپ تۇيىندەدى پروكۋراتۋرادان.