عارىشكەر ەكىنشى رەت عارىشقا اتتانادى.
الايدا بۇل جولعى ساپارى جەردە وتەدى. عارىشكەر ەكى سەرىگىمەن بىرگە ۇلتتىق عارىش ورتالىعى اۋماعىندا ورنالاسقان Space Nomad تاجىريبەلىك كەشەنىن سىناقتان وتكىزەدى، دەپ حابارلايدى Almaty-akshamy.kz 24.kz-كە سىلتەمە جاساپ.
ۇلتتىق عارىش ورتالىعىندا ورنالاسقان بۇل كەشەننىڭ ءىشى عارىش كەمەسىنىڭ ىشكى كورىنىسىنە ابدەن جاقىنداتىلعان. عالىمدار توبى وسى كەشەنگە بىرنەشە كۇنگە كىرىپ، كەلەشەكتە عارىشتا جۇرگىزىلۋى ءتيىس زەرتتەۋلەر ءتىزىمىن انىقتايدى. ال العاشقى ەكيپاج ەكى كۇن بويى كەشەن جۇمىسىن سىناقتان وتكىزبەك. كەشەننىڭ ورتالىق ازيادا بالاماسى جوق. ءبىر جىلدا تۇرعىزىلدى. ءتورت ادامنىڭ ءومىر سۇرۋىنە ىڭعايلى ەتىپ جابدىقتالعان. تاماقتانۋى، دەمالۋ، جۇمىس كەستەسى عارىش جاعدايىنا سايكەس تۇزىلگەن. قازىرگى تاڭدا تاعى بىرنەشە كەشەن سالۋ جوسپارى قاراستىرىلۋدا.
«جابىق كەڭىستىكتە ادامنىڭ پسيحولوگيالىق-فيزيولوگيالىق جاعدايى تەكسەرىلەدى. ءبىر ساپار وتىز كۇننەن ءبىر جىلعا دەيىن سوزىلۋى مۇمكىن. سونداي-اق وسى ءتيپتى بىرنەشە كەشەن سالىنادى. ولاردىڭ اراسىندا مارستىڭ، ايدىڭ بەدەرى بار كەشەن قۇرىلىسى جوسپارلانۋدا»، - دەيدى جوبا جەتەكشىسى رۋستام ابدراحمانوۆ.
جوباعا شەتەلدىكتەر ەرەكشە ىقىلاس تانىتۋدا. كاسىبي عارىشكەرلەرمەن قاتار تۋريستەر دە كەشەنگە كەلىپ، دايىندىقتان وتۋىنە بولادى.
«شەتەلدىك اگەنتتىكتەر تاراپىنان حالىقارالىق ەكيپاج قۇرۋعا قىزىعۋشىلىق بار. قازىرگى ۋاقىتتا عالىمداردان بولەك تۋريستەر قاتىساتىن ەكيپاجدار قۇرۋ نۇسقالارى تالقىلانۋدا. الداعى ۋاقىتتا بۇل ەكيپاجدار جاساقتالادى دەگەن ويدامىن»، - دەيدى «قازاقستان عارىش ساپارى» ۇك» اق باسقارما ءتوراعاسى ايدىن ايىمبەتوۆ.
اتالعان كەشەن جاس عالىمدار ءۇشىن قۋانىشتى جاڭالىق بولارى ءسوزسىز. ياعني، اەروعارىش سالاسىنا قىزىعىپ جۇرگەن ستۋدەنتتەر مەن وقۋشىلار ءوز جوبالارىن وسى جەردە جۇزەگە اسىرۋىنا مۇمكىندىك بار.
«Space Nomad جوباسى تەك ەلىمىزگە عانا ەمەس، جاستارعا دا ۇلكەن كومەگىن تيگىزەدى. مەكتەپ وقۋشىلارى ءوز جوبالارىن ەكيپاج مۇشەلەرىنە ۇسىنىپ، ولاردى ءىس جۇزىندە تەكسەرە الادى»، - دەيدى جاس عالىم ەراسىل تاۋەكەل.
ايتا كەتەيىك، كەلەسى ساپار شىلدە ايىنا جوسپارلانعان. ساپارعا عالىمدار قاتىسادى دەپ كۇتىلۋدە.