تاۋەلسىزدىك جىلدارى دۇنيە ەسىگىن اشىپ، وسىپ-جەتىلگەن جاس بۋىن بۇگىندە ەر جەتىپ، ۇلكەن ومىرگە، كەيبىرى ەل باسقارۋ ىسىنە دە ارالاسىپ جاتىر.
ق ر اقپارات جانە قوعامدىق دامۋ ءمينيسترى ايدا بالايەۆا الەۋمەتتىك جەلىدەگى پاراقشاسىندا قازاقستاندىقتاردى تاۋەلسىزدىك مەرەكەسىمەن قۇتتىقتادى، دەپ حابارلايدى Almaty-akshamy.kz
«بارشاڭىزدى تاۋەلسىزدىك كۇنى مەرەكەسىمەن شىن جۇرەكتەن قۇتتىقتايمىن! بيىلعى جىل حالقىمىز ءۇشىن ەل تاۋەلسىزدىگىنىڭ 30 جىلدىعى اياسىندا ەرەكشە ماڭىزعا يە بولدى. وسى بەلەسكە امان-ەسەن جەتۋ ءۇشىن ەلىمىز تالاي قيىندىقتار مەن داعدارىستاردى باستان وتكەردى. كوپشىلىك قاۋىم ازاتتىقتىڭ اق تاڭىنىڭ قالاي اتقانىنا كۋا بولدى. العاشقى توقىراۋ جىلداردىڭ سان ءتۇرلى سىناعىنان ءوتتى. وكىنىشكە وراي، تاۋەلسىزدىكتىڭ العاشقى قالىپتاسۋىنا ايانباي تەر توككەن قانشاما الدىڭعى بۋىن اعا-اپالارىمىز بۇگىنگە جەتپەي ومىردەن ءوتىپ كەتتى. دەسە دە، ۇرپاق امان بولسا، ءومىر جالعاسادى.
تاۋەلسىزدىك جىلدارى دۇنيە ەسىگىن اشىپ، وسىپ-جەتىلگەن جاس بۋىن بۇگىندە ەر جەتىپ، ۇلكەن ومىرگە، كەيبىرى ەل باسقارۋ ىسىنە دە ارالاسىپ جاتىر. سوندىقتان تاۋەلسىزدىكتىڭ 30 جىلدىعىنىڭ جەڭىسى مەن جەتىستىكتەرىنىڭ تۇبىندە بارشا قازاقستاندىقتاردىڭ ۇلەسى جاتىر. ەلىمىز تاۋەلسىزدىكتىڭ ءتورتىنشى ونجىلدىعىنا ىشكى جانە سىرتقى ساياساتى ورنىقتى، بىرلىگى مىعىم، ەكونوميكاسى قالىپتاسقان مەملەكەت رەتىندە اتتاپ وتىر. ءبىز تۇتاستىقتىڭ ءقادىرىن تولىق تۇسىنەتىن ءارى بيىك باعالاي بىلەتىن قوعام قالىپتاستىرا الدىق.
ەل باسىنا كۇن تۋعان پاندەميا كەزىندە ءبىرتۇتاس حالقىمىز مۇنى لايىقتى دالەلدەي الدى. ءبىز ەلدەگى تىنىشتىق پەن ىشكى تۇراقتىلىقتىڭ قوعامداعى ءاربىر ازاماتتىڭ سانالى ارەكەتىنە بايلانىستى ەكەنىن ۇعىندىق. اينالاعا جاناشىر بولىپ، جاقىندارىمىزعا كومەك قولىن سوزۋدىڭ قانشالىقتى ماڭىزدى ەكەنىن بىلدىك.
ولاي بولسا، تاۋەلسىزدىك مەرەكەسى بارشاڭىزعا جارقىن قۋانىش سىيلاسىن! دەندەرىڭىزگە ساۋلىق، وتباسىلارىڭىزعا اماندىق، باق-بەرەكە تىلەيمىن! ەلىمىز امان، زامانىمىز تىنىش، تاۋەلسىزدىگىمىز ماڭگىلىك بولسىن!» – دەپ جازدى ايدا بالايەۆا.