مۇسىلمانداردىڭ ۇلىق مەرەكەسى – قۇربان ايتپەن قۇتتىقتاعان مينيستر حانىم الەۋمەتتىك جەلىدەگى پاراقشاسىنا وسىلاي دەپ جازدى.
اقپارات جانە قوعامدىق دامۋ ءمينيسترى ايدا بالايەۆا قازاق ەلىن قۇربان ايت مەرەكەسىمەن قۇتتىقتادى، دەپ حابارلايدى Almaty-akshamy.kz.
«بارشاڭىزدى كەلىپ جەتكەن قۇربان ايتپەن شىن جۇرەكتەن قۇتتىقتايمىن.
قۇربان ايت – ءدۇيىم مۇسىلمان الەمى جۇمىلا تويلايتىن ۇلىق مەرەكە. بۇل - قۇرباندىق شالۋ ارقىلى دۇعا وقىپ، يماندىلىققا شاقىراتىن، مۇقتاج جاندارعا قول ۇشىن بەرۋ ارقىلى قايىرىمدىلىققا ۇندەيتىن ىزگىلىكتى امال. تاۋەلسىزدىكتىڭ ارقاسىندا حالىقپەن قايتا قاۋىشقان مەيرام وسى 30 جىل ىشىندە ەلدى رۋحاني تاتۋلىق پەن بەرەكەگە بىرىكتىرەتىن ءداستۇرىمىزدىڭ اجىراماس بولىگىنە اينالدى.وكىنىشكە وراي، بيىل دا قۇربان ايت ەكىنشى جىل قاتارىنان پاندەمياعا بايلانىستى كارانتين تالاپتارى جاعدايىندا كەلىپ تۇر. ەڭ باستىسى، جاساعان امالدارىڭىز، شالعان قۇرباندارىڭىز، وقىعان دۇعا-تىلەكتەرىڭىز قابىل بولسىن! كەلەر جىلعى قۇربان ايتتى ءداستۇرلى جاعدايدا قارسى الۋدى بۇيىرتسىن دەپ تىلەيىك جانە ول ءۇشىن ءقاۋىپتى ىندەتتى جەڭۋ جولىندا ساقتىق شارالارىنا باعىنىپ، توزىمدىلىك تانىتايىق. كوپۇلتتى حالقىمىزدىڭ بىرلىگى نىعايىپ، ىنتىماعى ارتا بەرسىن!
قۇربان ايت قۇتتى بولسىن!» - دەلىنگەن ايدا بالايەۆانىڭ فەيسبۋك پاراقشاسىنداعى قۇتتىقتاۋىندا.