بۇعان دەيىن دە بيىلعى قۇربان ايت مەرەكەسىنىڭ ونلاين رەجيمدە ءوتىپ جاتقانىن حابارلاعانبىز.
الماتى قالاسىنىڭ ءدىن ىستەرى باسقارماسى مۇسىلمانداردان قۇربان ايت مەرەكەسىن تويلاۋ كەزىندە شەكتەۋ شارالارىنا تۇسىنىستىكپەن قاراۋدى ءوتىندى، دەپ حابارلايدى Almaty-akshamy.kz
ەسكە سالساق، بيىل كارانتين مەن جۇقتىرعاندار سانىنىڭ وسۋىنە بايلانىستى عيبادات ەتۋگە ءارى قۇرباندىق شالۋ ورىندارىندا ادام كوپ بولۋىنا تىيىم سالىندى.
الماتى قالاسى ءدىن ىستەرى باسقارماسى باسشىسىنىڭ ورىنباسارى ەرعالي كوشەكە ازاماتتاردان قالاداعى ەپيدەميولوگيالىق جاعدايدى ەسكەرۋگە ءارى قۇربان شالۋ ورنىنا كەلمەۋگە، ۇيدە ناماز وقىپ، مەرەكەنى شاعىن وتباسىلىق ورتادا اتاپ وتۋگە شاقىردى.
«الماتىدا كوروناۆيرۋسقا بايلانىستى جاعداي كۇن سايىن ناشارلاۋدا. ىندەت كەزەڭىن كەز كەلگەن ءدىندار ادام يسلام ءدىنى تالاپ ەتكەندەي دانالىق، كىشىپەيىلدىلىكپەن قابىلداۋى كەرەك. ءبىزدىڭ ورتاق مىندەتىمىز مەرەكەنى جايلى، ءقاۋىپسىز وتكىزۋ. حالىقتىڭ دەنساۋلىعى ءقازىر بارىنەن دە ماڭىزدى»، – دەدى ءدىن ىستەرى باسقارماسىنىڭ وكىلى ەرعالي كوشەكە.
قازىرگى ۋاقىتتا qurban2021.kz. سايتى ارقىلى ءوتىنىش بەرگەندەردىڭ اتىنان يمامدار، مەشىت قىزمەتكەرى مەن ەرىكتىلەر سويۋ ورىندارىندا بولىپ، قۇرباندىق شالۋ راسىمدەرىن قاشىقتىقتان وتكىزەدى.
قۇرباندىق ەتى ءقازىردىڭ وزىندە تاراتىلىپ، مۇقتاج وتباسىلاردىڭ ۇيلەرىنە جەتكىزىلۋدە.
«ساعات 10-داعى مالىمەت بويىنشا، 800-دەن استام ادام قۇرباندىققا شالىنعان مالدىڭ ەتىن الۋعا ءوتىنىش بەردى. 50 قوي مەن ءىرى قارا قۇرباندىققا شالىنىپ، 225 وتباسىنا ەت جەتكىزىلدى. بارلىق ءراسىم سانيتارلىق-ەپيدەميولوگيالىق نورمالاردى ساقتاي وتىرىپ، جۇمىلدىرىلعان ادامنىڭ ەڭ از قاتىسۋىمەن وتەدى»، – دەدى ەرعالي كوشەكە.
سونىمەن قاتار، الماتىداعى ەپيدەميولوگيالىق جاعدايدىڭ كۇرت شيەلەنىسۋىنە بايلانىستى قالا مەشىتتەرىندە قۇربان ايت مەرەكەسىنە ارنالعان دۇعالار وقىلمايدى. مۇسىلماندارعا ۇيدە ەكى راكات ناماز وقۋ ۇسىنىلدى.
ءسوز سوڭىندا باسقارما وكىلى تاعى دا بارلىق ءدىندارلاردى وزدەرىنىڭ ارەكەتتەرىن شەكتەۋگە، قوناققا بارماۋعا، بۇقارالىق ءىس-شارا وتكىزبەۋگە شاقىردى.
ايتا كەتسەك، وتكەن تاۋلىكتە الماتىدا كوروناۆيرۋس جۇقتىرعانداردىڭ جالپى سانىنا (63 مىڭنان استام ادام) تاعى 629 ادام قوسىلدى. وتكەن اپتادا ناۋقاستاردىڭ كۇندەلىكتى ءوسۋى تىركەلدى. 18 شىلدە كۇنى تاۋلىكتىك ءوسىم 798 ادامعا جەتتى.