كەشە، 6 ناۋرىزدا، ق ر پارلامەنتى ءماجىلىسىنىڭ ءتوراعاسى ەرلان قوشانوۆ پەن ق ر مادەنيەت جانە اقپارات ءمينيسترى ايدا بالايەۆا «AMANAT» پارتياسىنىڭ ايەلدەر قاناتى وكىلدەرىمەن كەزدەستى.
حالىقارالىق ايەلدەر كۇنىنە وراي ماجىلىستە وتكەن ءىس-شارا گەندەرلىك تەڭدىك، ايەلدەردىڭ قوعامداعى ءرولى مەن ولاردىڭ مەملەكەتتىك باسقارۋ ىسىنە قاتىسۋى ماسەلەلەرىنە ارنالدى، دەپ حابارلايدى aqshamnews.kz.
مينيستر ءوز سوزىندە قازاقستاندا ايەلدەردىڭ ءوزىن-وزى دامىتۋىنا جانە ەلدىڭ دامۋىنا ۇلەس قوسۋىنا مۇمكىندىك بەرەتىن جۇيەلى شارالار جۇزەگە اسىرىلىپ جاتقانىن اتاپ ءوتتى.
كەزدەسۋ بارىسىندا مەملەكەتتىك قىزمەتتەگى ايەلدەردىڭ باسشىلىق لاۋازىمداردا از قامتىلۋى ماسەلەسى دە قوزعالدى.
مينيستر مەملەكەتتىك قىزمەتشىلەردىڭ 56%-عا جۋىعى ايەلدەر بولعانىمەن، ولاردىڭ باسشىلىق لاۋازىمدارداعى ۇلەسى 40%-دان تومەن ەكەنىن اتاپ ءوتتى.
سونداي-اق، ايدا بالايەۆا قازىرگى تاڭدا ەلىمىزدە وبلىستار مەن رەسپۋبليكالىق ماڭىزى بار قالالار اكىمدەرىنىڭ ورىنباسارى قىزمەتىن نەبارى توعىز ايەل اتقارىپ وتىرعانىن ايتتى. مينيسترلىكتەردەگى جاعداي دا ۇقساس – 21 مينيسترلىكتىڭ ىشىندە ۆيسە-مينيستر قىزمەتىن بار بولعانى سەگىز ايەل اتقارادى، بۇل ورتالىق جانە جەرگىلىكتى اتقارۋشى ورگاندارداعى نەگىزگى لاۋازىمداردىڭ نەبارى 7-10%-ىن قۇرايدى.
ۆەدومستۆو باسشىسى اسىرەسە تاجىريبەسى مول دەپارتامەنت ديرەكتورلارى مەن كوميتەت ءتوراعالارىن ورتالىق جانە جەرگىلىكتى اتقارۋشى ورگاندارداعى نەگىزگى لاۋازىمدارعا جوعارىلاتۋ ماڭىزدى ەكەنىن ەرەكشە اتاپ ءوتتى.
ءمينيستردىڭ پىكىرىنشە، كادرلاردى ىرىكتەۋگە جۇيەلى تۇردە قاراۋ قاجەت جانە كاسىبي ءارى مانساپتىق وسۋگە لايىقتى مامانداردى ماقساتتى تۇردە انىقتاۋ كەرەك.
«ۇلتتىق كوميسسيا «امانات» پارتياسىنىڭ ايەلدەر قاناتىمەن بىرلەسىپ، مەملەكەتتىك قىزمەتتەگى ايەلدەردىڭ ساپالىق قۇرامىنا تەرەڭ تالداۋ جۇرگىزىپ، ولاردى مەملەكەتتىك قىزمەتتە جوعارىلاتۋعا قاتىستى ۇسىنىمدار ازىرلەۋدى ۇسىنامىن. مەن ستاتيستيكالىق كورسەتكىش ءۇشىن جاساندى تۇردە جوعارىلاتۋعا قارسىمىن. كەرىسىنشە، بۇل مەحانيزم تاجىريبەسىنە، بەدەلىنە، كاسىبي قۇزىرەتتىلىگى مەن جەكە قاسيەتتەرىنە ساي ەڭ ۇزدىكتەردى انىقتاۋعا مۇمكىندىك بەرەدى»، – دەدى مينيستر.
سونىمەن قاتار، ايدا بالايەۆا ايەلدەرگە ارنالعان كەڭەس بەرۋ ورتالىقتارىن قۇرۋدى ۇسىندى.
«تاعى ءبىر ماڭىزدى ماسەلە – ايەلدەرگە ارنالعان ءبىرىڭعاي كونسۋلتاسيالىق ورتالىقتىڭ بولماۋى. ءيا، بۇگىندە تۇرمىستىق زورلىق-زومبىلىققا ۇشىراعان نەمەسە قيىن جاعدايعا تاپ بولعان ايەلدەرگە كومەك كورسەتەتىن ورتالىقتار بار. الايدا، مەملەكەتتىك قىزمەتكە نەمەسە كۆازيمەملەكەتتىك سەكتورعا قالاي ورنالاسۋعا بولاتىنىن تۇسىندىرەتىن ارنايى ورتالىقتار جوق. سوندىقتان، قوعامدىق قابىلداۋ بولىمدەرىنىڭ الەۋەتىن پايدالانا وتىرىپ، ولاردىڭ جانىنان جۇمىسقا ورنالاسۋ ءتارتىبى مەن باسقا دا ماڭىزدى ماسەلەلەر بويىنشا كەڭەس بەرەتىن ارنايى كابينەتتەر اشۋدى ۇسىنامىن»، – دەدى ايدا بالايەۆا.
مينيستر مەملەكەتتىك قىزمەتشىنىڭ باستى ميسسياسى – ءوز قىزمەتتىك مىندەتتەرىن جاۋاپكەرشىلىكپەن ءارى ادال ورىنداۋ ەكەنىن اتاپ ءوتتى.
«مەملەكەتتىك قىزمەتتىڭ بارلىق ساتىلارىنان وتكەن ادام رەتىندە ايتارىم، ءومىرىڭدى مەملەكەتكە قىزمەت ەتۋگە ارناۋ – بۇل تەمىردەي ءتارتىپ، جوعارى جاۋاپكەرشىلىك جانە بار كۇش-جىگەرىڭدى سارپ ەتۋ دەگەن ءسوز. بۇل – ۇلكەن مارتەبە. مەملەكەتتىك مۇددەنى جوعارى قويىپ، ءوز ۋاقىتىڭ مەن وتباسىڭنىڭ مۇددەسىنەن باس تارتۋعا دايىن بولۋدى تالاپ ەتەدى. ءوز كاسىبىڭدى شەكسىز ءسۇيۋ – بۇل جولدىڭ باستى شارتى. سوندىقتان بۇل جولدى سانالى تۇردە تاڭداۋ قاجەت»، – دەپ قورىتىندىلادى مادەنيەت جانە اقپارات ءمينيسترى.