تىرشىلىك ءنارىنىڭ ساقشىلارى

ايەل ادام – وتباسىنىڭ بەرەكەسى عانا ەمەس، ەل يگىلىگىنە ەڭبەك ەتكەن قايراتكەر دە بولا الادى. اينالامىزدا كوپتەگەن نازىكجاندىلار ءومىردىڭ ءتۇرلى سالالارىندا جەتىستىككە جەتىپ، اۋىر جۇمىستاردى دا ەر-ازاماتتارمەن قاتار اتقارىپ كەلەدى. وسىنداي جانداردىڭ قاتارىندا ءاپالى-سىڭلىلى زاۋرە مەن گۇلنار جالعاسبايەۆالاردى دا اتار ەدىك. ولار الماتى قالاسىن ساپالى اۋىزسۋمەن قامتاماسىز ەتەتىن كۇردەلى سالادا ەڭبەك ەتىپ كەلە جاتىر. 
قالا تۇرعىندارى ءۇشىن سۋ – كۇندەلىكتى قاجەتتىلىك. ءبىراق ونىڭ ۇزدىكسىز ءارى ساپالى جەتكىزىلۋىنىڭ ارتىندا ۇلكەن ەڭبەك جاتىر. بۇل مىندەتتى ورىنداۋ – اسا ۇلكەن جاۋاپكەرشىلىكتى، قىراعىلىق پەن بىلىكتىلىكتى قاجەت ەتەدى. وسى سالادا جىلدار بويى جۇمىس ىستەپ كەلە جاتقان زاۋرە پەن گۇلنار – ءوز ءىسىنىڭ ناعىز ماماندارىنا اينالعان.

سۋ ساپاسىن باقىلايمىز

زاۋرە جالعاسبايەۆا – «الماتى Cۋ» مكك-نىڭ «باتىس» سۋمەن جابدىقتاۋ جانە سۋ بۇرۋ بولىمىندە وپەراتور قىزمەتىن اتقارادى. بۇل سالاداعى ەڭبەك ءوتىلى 10 جىلدان اسادى. ونىڭ نەگىزگى مىندەتى – ءۇش ميلليونعا جۋىق تۇرعىنى بار مەگاپوليستى تازا اۋىزسۋمەن قامتاماسىز ەتۋ ءۇشىن سۋدىڭ قۇرامىنداعى گيپوحلوريد مولشەرىن تۇراقتى دەڭگەيدە ۇستاپ وتىرۋ. 
– ءبىز ءۇش تاۋلىك سايىن اۋىسىممەن جۇمىس ىستەيمىز. تاڭەرتەڭ كەلگەندە الدىمەن تەرريتوريانى تەكسەرىپ، كەزەكشىلىكتەگى ارىپتەستەرىمىزدەن جۇمىستى قابىلداپ الامىز. سۋدىڭ ساپاسىن مۇقيات باقىلاپ، گيپوحلوريد دەڭگەيىن تەكسەرەمىز. قالا تۇرعىندارىنىڭ دەنساۋلىعى مەن ءومىر ساپاسى ءبىزدىڭ جۇمىسىمىزعا تىكەلەي بايلانىستى بولعاندىقتان، بۇل ىسكە وتە جاۋاپكەرشىلىكپەن قارايمىز، – دەيدى زاۋرە اپاي.
ول سالاداعى بىلىكتى مامانداردىڭ ءبىرى، ومسك قالاسىنداعى اۋىل شارۋاشىلىق ينستيتۋتىن ءبىتىرىپ، كەيىن الماتىعا قونىس اۋدارعان. جۇبايى حالمۋدين سۇلەيوۆ تە «الماتى Cۋ» مەكەمەسىندە سلەسار بولىپ جۇمىس ىستەيدى.
– جۇمىسىمىز جەڭىل ەمەس. تۇنگى اۋىسىمدا دا قىزمەت ەتەمىز، بارلىق جۇيەنى ۇنەمى باقىلاپ وتىرۋ قاجەت. ناسوستار ىستەن شىقپاۋىن، جارىق وشپەۋىن قاداعالايمىز. كەز كەلگەن اقاۋ تۋىنداسا، بىردەن ديسپەچەرگە جانە باسشىلىققا حابارلايمىز، – دەيدى ول.
زاۋرەش اپايدىڭ ومىردەگى ەڭ ۇلكەن ارمانى – بالالارى مەن نەمەرەلەرىنىڭ اماندىعى.
– ايەل باقىتى – وتباسىنىڭ بەرەكەسى مەن ۇرپاعىنىڭ اماندىعىندا. جۇمىستان تىس ۋاقىتتا بالالارىم مەن نەمەرەلەرىمنىڭ قاسىندا بولعان ساتتەر – مەن ءۇشىن ەڭ باقىتتى كەزدەر. سونىمەن قاتار، الماتى حالقىن ساپالى اۋىزسۋمەن قامتۋعا ءوز ۇلەسىمىزدى قوسىپ جۇرسەك، بۇل دا ۇلكەن ماقتانىش، – دەيدى ول.

اپكەم – ومىرلىك تىرەگىم

زاۋرەشتىڭ ءسىڭلىسى گۇلنار بولسا وسى سالادا 5 جىلدان بەرى ەڭبەك ەتىپ كەلەدى. ءقازىر «الماتى سۋ» مەكەمەسىندە سۋ قوندىرعىسىنىڭ ءماشينيسى بولىپ جۇمىس ىستەيدى. جاۋاپتى مىندەتى – قالاداعى ناسوس جۇيەسىنىڭ ۇزدىكسىز جۇمىسىن قامتاماسىز ەتۋ.
– جۇمىس الدىنداعى مىندەت – اۋماقتىڭ تازالىعىن تەكسەرۋ. ودان كەيىن ناسوستار مەن باسقا دا قوندىرعىلاردىڭ جۇمىسىن قاراپ، ولاردىڭ قالىپتى جاعدايدا ەكەنىن انىقتايمىز. بىزدەگى «سەنترابەجنىي» قوندىرعىسىندا ءتورت ناسوس بار. ونىڭ ەكەۋى «زاپاد» ۋچاسكەسىنە، ال قالعان ەكەۋى ناۋرىزباي اۋدانىن سۋمەن قامتۋعا باعىتتالعان، – دەيدى گۇلنار ءوز جۇمىسىن تانىستىرعاندا. 
گۇلناردىڭ جۇبايى وڭتالاپ توقمىرزايەۆ – قىزىلوردا وبلىسى، قازالى اۋدانىنىڭ تۋماسى. قازىرگى ۋاقىتتا ول بالقاش اۋدانىندا جۇمىس ىستەيدى.
– ۇلىم اقنيەت ج.ەلەبەكوۆ اتىنداعى مۋزىكا كوللەدجىندە 2-كۋرستا وقيدى. ءارقاشان سونىڭ تىلەۋىن، ەلىمنىڭ، جۇرتىمنىڭ تىلەۋىن تىلەۋمەن وتىرام – دەيدى گۇلنار.
گۇلنار ءۇشىن اپاسى زاۋرەش – ومىرلىك تىرەك. ءبىر ۇجىمدا ەڭبەك ەتكەندىكتەن، بىر-بىرىنە ءاردايىم قولداۋ كورسەتىپ، جۇمىس بارىسىن دا، ومىردەگى ماسەلەلەردى دە بىرگە ءبولىسىپ وتىرادى.
سۋ – تىرشىلىك كوزى، ال ونى جەتكىزۋ – جاۋاپتى ءىس. ءاپالى-سىڭلىلى زاۋرە پەن گۇلنار ءوز جۇمىستارىنا ادال، كاسىبي ماماندار. ولاردىڭ ارقاسىندا الماتى قالاسىنىڭ تۇرعىندارى تازا ءارى ساپالى اۋىزسۋ تۇتىنا الادى.
سۋ سالاسى – ۇلكەن جاۋاپكەرشىلىكتى تالاپ ەتەتىن كۇردەلى سالا. ءبىراق بۇل جۇمىستى نازىك جۇرەكتى، مەيىرىمدى جاندار دا ەرلەرمەن تەڭ دارەجەدە اتقارىپ كەلەدى. قىزداردىڭ قاجىرلى ەڭبەگى – سونىڭ جارقىن دالەلى.
قالا حالقىن تازا اۋىزسۋمەن قامتاماسىز ەتۋ جولىندا ايانباي تەر توگىپ جۇرگەن زاۋرە پەن گۇلنارداي جاندارعا العىسىمىز شەكسىز. 8 ناۋرىز مەرەكەسى قارساڭىندا سىزدەرگە ءار كۇنىڭىز كوكتەمدەي جىلى، گۇلدەي اسەم، كۇندەي جارقىن بولسىن دەپ تىلەك ايتامىز. 

•    كەرەك دەرەك
•    «الماتى سۋ» مكك-ىنىڭ ينجەنەريا، قارجى، سۋمەن جابدىقتاۋ جانە ساپانى باقىلاۋ بولىمدەرىندە بارلىعى 1260 ايەل جۇمىس ىستەيدى. 
•    2024 جىلعى دەرەكتەرگە سۇيەنسەك، قازاقستاننىڭ سۋ سالاسىندا 1700-دەن استام ايەل جۇمىس ىستەيدى. اتاپ ايتقاندا، «قازسۋشار» مەملەكەتتىك كاسىپورنىندا 1579 نازىكجاندى ارۋلار قىزمەت اتقارادى. 
•    سۋ رەسۋرستارى جانە يرريگاسيا مينيسترلىگىندە 75 ايەل بار. مينيسترلىك جانىنداعى سۋ شارۋاشىلىعى جانە باسسەيندىك ينسپەكسيالار كوميتەتىندە 99 ايەل جۇمىس ىستەيدى.