مەملەكەت باسشىسى قاسىم-جومارت توقايەۆ 2024 جىلعى 15 ناۋرىزدا ۇلتتىق قۇرىلتايدىڭ ءۇشىنشى وتىرىسىندا سويلەگەن سوزىندە "ايبىن" وردەنىنە بەرىلەتىن ءۇش قازاقستاندىق جاۋىنگەر تۋرالى ايتتى، دەپ حابارلايدى اlmaty-akshamy.kz.
پرەزيدەنتتىڭ سوزىنشە، ەلىمىزدىڭ جىلناماسىنا ەسىمى التىن ارىپپەن جازىلعان باتىرلارىمىز از ەمەس.
"مەن حالقىمىزدىڭ وسىنداي ءۇش داڭقتى پەرزەنتىنە جەكە توقتالعىم كەلەدى. مايدانعا ۆزۆود كومانديرى رەتىندە اتتانعان ساعادات نۇرماعامبەتوۆ سوعىستى بەرلين تۇبىندە باتالون كومانديرى بولىپ اياقتادى. سۇراپىل سوعىستىڭ بارلىق قيىندىعىن كورگەن ول تاۋەلسىز قازاقستاننىڭ تۇڭعىش قورعانىس ءمينيسترى بولدى. ايرىقشا قولباسشىلىق قابىلەتىمەن اتى اڭىزعا اينالعان تاعى ءبىر تۇلعا – باۋىرجان مومىش ۇلى. ول مايدان شەبىندەگى ەڭ قيىن شايقاستارعا قاتىستى، باتالون، پولك، ديۆيزيا باسقاردى. ونىڭ قورشاۋدان شىعۋ ءتاسىلى كەيىن سوعىس ونەرىنە "مومىش ۇلى ءسپيرالى" دەگەن اتاۋمەن ەندى. راقىمجان قوشقاربايەۆتىڭ وشپەس ەرلىگى دە بۇگىندە ەش تالاس تۋدىرمايدى. ول – العاشقىلاردىڭ ءبىرى بولىپ رەيحستاگقا تۋ تىككەن باتىر"، - دەپ ايتتى مەملەكەت باسشىسى.