ايازدى كۇنگى اپات: ءبۇتىن ءبىر اۋدان تۇرعىندارى قاقاعان سۋىقتا جىلۋسىز قالدى

قاقاعان اياز كەزىندە ششۋچينسك قالاسىنىڭ ينستيتۋت شاعىن اۋدانى قازاندىقتاعى اپات سالدارىنان جىلۋسىز قالدى، دەپ حابارلايدى Aqshamnews.kz ءتىلشىسى.

قالاداعى №20 قىزمەتتىك قازاندىقتىڭ ىستەن شىعۋىنا بايلانىستى توتەنشە جاعداي تىركەلىپ، كوممۋنالدىق قىزمەتتەر جىلۋ بەرۋدى ۋاقىتشا توقتاتۋعا ءماجبۇر بولعان. سونىڭ سالدارىنان بىرنەشە تۇرعىن ءۇي جىلۋدان اجىراپ، تۇرعىندار سۋىقتا قالدى.

وقيعاعا بايلانىستى بۋراباي اۋدانىنىڭ اكىمى اراي سادىقوۆ الەۋمەتتىك جەلى ارقىلى تۇرعىندارعا ۇندەۋ جاساپ، جاعدايعا تۇسىنىستىك تانىتۋدى سۇرادى.

«قۇرمەتتى ششۋچينسك قالاسى، بۋراباي اۋدانىنىڭ تۇرعىندارى! بۇگىن №20 قىزمەتتىك قازاندىقتا اپاتتى جاعداي ورىن الدى. وسىعان بايلانىستى ينستيتۋت شاعىن اۋدانىنا جىلۋ بەرۋ ۋاقىتشا توقتاتىلدى. قازىرگى تاڭدا بارلىق كۇش-جىگەر اپاتتى جويۋعا باعىتتالدى»، – دەپ جازدى اۋدان اكىمى.

اكىمنىڭ ايتۋىنشا، جوندەۋ جۇمىستارى تاۋلىك بويى جۇرگىزىلىپ جاتىر. ماماندار اقاۋدى مۇمكىندىگىنشە قىسقا مەرزىمدە قالپىنا كەلتىرۋگە كۇش سالۋدا. سونداي-اق اۋدان باسشىسى جاعدايدىڭ باقىلاۋدا ەكەنىن ايتىپ، اپات سالدارى جاقىن ۋاقىتتا جويىلىپ، جىلۋ بەرۋ قايتا ىسكە قوسىلاتىنىن جەتكىزدى.