مەگاپوليستە رەسپۋبليكالىق ءىى وڭىرلىك مەرزىمدى باسىلىمدار فورۋمى ءوتىپ جاتىر
الماتى قالاسىنداعى «دوستىق ۇيىندە» قازاقستان رەسپۋبليكاسى مادەنيەت جانە اقپارات مينيسترلىگىنىڭ ۇيىمداستىرۋىمەن وڭىرلىك مەرزىمدى باسپا ءسوز باسىلىمدارىنىڭ رەسپۋبليكالىق ءىى فورۋمى ءوتىپ جاتىر. ەكى كۇنگە جوسپارلانعان اۋقىمدى ءىس-شاراعا ەلىمىزدىڭ ايماقتارىنان اقپارات سالاسىن دامىتۋعا ۇلەس قوسىپ جۇرگەن 100-دەن استام مەديا مامان كەلدى.
فورۋمنىڭ باستى ماقساتى – زاماناۋي مەديا سالاسى بويىنشا وڭتايلى ادىس-تاسىلدەردى قاراستىرىپ، تاجىريبە الماسۋ، مەرزىمدى باسپا ءسوز سالاسىنداعى وزەكتى ماسەلەلەر بويىنشا پىكىرتالاس الاڭىن ۇيىمداستىرۋ.
القالى جيىننىڭ ءبىرىنشى كۇنى «باسىلىمداردا سانالى كونتەنتتى قالىپتاستىرۋ»، «باسپا باسىلىمدارىن تانىمال ەتۋ جانە تاراتۋ: ايماقتىق قىرلارى» جانە «سالالىق جۋرناليستيكا» تاقىرىپتارىندا پانەلدىك وتىرىستار ءوتتى.
– بۇقارالىق اقپارات قۇرالدارى – حالىق مەن بيلىك اراسىنداعى التىن كوپىر. سوندىقتان مەملەكەت اقپارات قۇرالدارىنىڭ ەركىن دە ساپالى جۇمىس ىستەۋى ءۇشىن ءاردايىم قولداۋ كورسەتىپ وتىرادى. وڭىردەگى حالىقتىڭ كوڭىل كۇيىن جەتكىزەتىن تىلشىلەر بولعاندىقتان، ايماقتاعى احۋالدىڭ بەت-بەينەسى جەتكىزىلەتىن اقپاراتتىڭ ساپاسىنا بايلانىستى ەكەنى دە بەلگىلى. ەكى كۇندى قامتيتىن فورۋم وڭىرلەردەن كەلگەن اقپارات وكىلدەرى ءۇشىن جەمىستى ءارى ءتيىمدى بولادى دەپ سەنەمىن»، – دەدى العاشقى پانەلدىك وتىرىستا ءسوز العان قازاقستان رەسپۋبليكاسى مادەنيەت جانە اقپارات مينيسترلىگى اقپارات كوميتەتىنىڭ ءتوراعاسى مەيىرلان راحانوۆ.
ءىى وڭىرلىك مەرزىمدى باسىلىمدار فورۋمىندا ق ر پارلامەنتى سەناتىنىڭ دەپۋتاتى نۇرتورە ءجۇسىپ، ق ر پارلامەنتى ءماجىلىسىنىڭ دەپۋاتتارى قازىبەك يسا مەن ەرمۇرات ءباپي، ق ر پرەزيدەنتى باسپا ءسوز حاتشىسىنىڭ ورىنباسارى ەرجان بايتىلەس، الماتى قالاسى قوعامدىق دامۋ باسقارماسىنىڭ باسشىسى ايدار ەسەنبەكوۆ ءسوز سويلەدى.
القالى توپتىڭ الدىندا «Alatau Aqparat مەدياحولدينگىنىڭ باس ديرەكتورى ەرجان قالىمباي ۇلى دا ءسوز تىزگىنىنە يە بولىپ، وڭىرلىك بۇقارالىق اقپارات قۇرالدارىندا كونتەنت ساپاسىن ارتتىرۋ تۋرالى وي-پىكىرلەرىمەن ءبولىستى.
فورۋمنىڭ پلەنارلىق وتىرىسىندا «جاس الاش» گازەتىنىڭ باس رەداكتورى الماس ءنۇسىپ پەن «مىسل» جۋرنالىنىڭ باس رەداكتورى اسىل ساعىمبايەۆ ساراپتامالىق ماتەريال جازۋدىڭ ءستيلى تۋرالى ءسوز قوزعاسا، فيلولوگيا عىلىمىنىڭ دوكتورى ورىناي جۇبايەۆا باسپا ءسوز بەتتەرىندە قاتە قولدانىلىپ جۇرگەن سوزدەر مەن تىركەستەر تۋرالى تارقاتتى. «دات» گازەتىنىڭ باس رەداكتورى قۇتماعانبەت قونىسبايەۆ، «كۋرسيۆ» گازەتىنىڭ شەف رەداكتورى تاتيانا نيكولايەۆا، «كازاحستانسكايا پراۆدا» گازەتىنىڭ ءفوتوتىلشىسى يۋريي بەككەر دە ءتىلشى قاۋىمىنىڭ كاسىبي شەبەرلىگىنىڭ ماڭىزدى قىرلارى تۋرالى تىلگە تيەك ەتتى.
ال بۇگىن ينتەرنەت رۋسۋرستارى مەن الەۋمەتتىك جەلىدەگى اقپاراتتار اعىنى اراسىندا مەرزىمدى باسىلىمداردى باسەكەگە قابىلەتتى ەتۋ، باسپا باسىلىمدارىندا YouTube ارناسىن قالاي دامىتۋعا بولاتىنى، جاساندى ينتەللەكت، باسىلىمداردىڭ بالالار كونتەنتىن قالىپتاستىرۋدىڭ يدەولوگيالىق شارتتارى مەن تەتىكتەرى تۋرالى وي-پىكىرلەر ساراپقا سالىناتىن بولادى.