«الماتى - ءبىزدىڭ ورتاق ءۇيىمىز» ناۋقانى اياسىندا بوستاندىق اۋدانىنىڭ كوميۋنيتي ورتالىعىندا «پەچا-كۋچا» فورماتىندا بەلسەندى جاستاردىڭ كەزدەسۋى ءوتىپ، ماڭىزدى ەكولوگيالىق ماسەلەلەر تالقىلاندى.
كەزدەسۋدە جاستار ەكولوگيانى جاقسارتۋعا باعىتتالعان جوباسىن ۇسىندى، سونداي-اق يدەياسى مەن پىكىرىن ءبولىستى. ءىس-شاراعا قالامىزدىڭ 11 جوو ستۋدەنتتەرى قاتىسىپ، 11 ەكوجوبانى ۇسىندى. ولاردىڭ اراسىندا قاتتى قالدىقتاردى قايتا وڭدەۋگە، تاماق قالدىقتارىن بيوتىڭايتقىشقا اينالدىرۋعا، قايتا وڭدەلگەن پلاستيك قالدىقتارىنان تۇرمىستىق زاتتاردى وندىرۋگە، كوشەت وتىرعىزۋ مەن جانۋارلاردى قورعاۋعا قاتىستى جوبالار بولدى.
«پەچا-كۋچا»-دا ءبىز اۆتورلىق شامداردى جاساۋدى قامتيتىن «ReCyGlass» جوباسىن تانىستىردىق. شىنى بوتەلكەلەردى قايتا وڭدەپ، ولاردى بىرەگەي ديزاينى بار شامدارعا اينالدىرامىز. جوبا قورشاعان ورتاعا تەرىس اسەردى ازايتۋمەن قاتار، لاستانۋ ماسەلەسىنە جانە تۇراقتى تۇتىنۋ تاجىريبەسىنە كوشۋ قاجەتتىلىگىنە نازار اۋدارادى. سونداي-اق، ۇيىمداستىرۋشىلارعا وسىنداي جاڭا فورماتتاعى ءىس-شارالار وتكىزگەنى ءۇشىن العىسىمىزدى بىلدىرگىمىز كەلەدى، ول جەردە ءبىز يدەيالاردى بولىسە الامىز»، - دەدى نارحوز ۋنيۆەرسيتەتى ەكولوگيا فاكۋلتەتىنىڭ 4 كۋرس ستۋدەنتى سايا كۇنشاشيەۆا.
ءىس-شارا جاستار اراسىندا ەكولوگيالىق سانانى ارتتىرۋعا جانە ەكولوگيالىق باستامالاردى دامىتۋعا باعىتتالعان.
ايتا كەتۋ كەرەك، بۇل ءىس-شارا الماتىنىڭ مەدەۋ جانە الاتاۋ اۋداندارىنىڭ كوميۋنيتي ورتالىقتارىندا دا ءوتتى.
ەستەرىڭىزگە سالا كەتەيىك، 8 ساۋىردە «الماتى – ءبىزدىڭ ورتاق ءۇيىمىز» ناۋقانى باستالدى. ءاربىر تۇرعىن قالانى دامىتۋ مەن كوركەيتۋگە ۇلەس قوسا الادى.
تولىق اقپارات almaty.kz سايتى مەن الماتى اكىمدىگىنىڭ الەۋمەتتىك جەلىلەرىندەگى پاراقشالارىندا جاريالانادى. سونداي-اق، قالاداعى باننەر، پلاكات جانە افيشالارداعى ارنايى QR-كود ارقىلى ۆەب-سايتقا كىرۋگە بولادى.
ناۋقاننىڭ بەلسەندى قاتىسۋشىلارىنا ارنالعان الەۋمەتتىك جەلىدەگى حەشتەگتەر: #الماتىناشوبششييدوم، #ناسمنوگوگورودودين، #ءالماتىبىزدىڭورتاقۇيىمىز، #بىزكوپپىزقالاجالعىز.