بيىل ۇلى اعارتۋشى عالىم، قوعام جانە ساياسي قايراتكەر احمەت بايتۇرسىن ۇلىنىڭ تۋعانىنا 150 جىل تولىپ وتىر.
احمەت بايتۇرسىن ۇلىنىڭ 150 جىلدىق مەرەيتويىنا وراي 12 تومدىق شىعارمالار جيناعى جارىق كورەدى، دەپ حابارلايدى Almaty-akshamy.kz
«مەرەيتوي اياسىندا ءبىرقاتار ماڭىزدى عىلىمي-زەرتتەۋ، مادەني جانە قوعامدىق ءىس-شارالار ۇيىمداستىرىلدى. جىل سوڭىنا دەيىن احمەت بايتۇرسىن ۇلىنىڭ 12 تومدىق ەڭبەكتەر جيناعىن باسىپ شىعارۋ جانە ونى ەلىمىزدىڭ كىتاپحانالارىنا تاراتۋ جوسپارلانعان. سونداي-اق مەرەيتوي اياسىندا ۇلى اعارتۋشىنىڭ ءومىرى مەن قىزمەتى تۋرالى تولىقمەتراجدى كوركەم فيلم ءتۇسىرىلىمى جوسپارلانىپ وتىر»، - دەلىنگەن مادەنيەت جانە سپورت مينيسترلىگىنىڭ باسپا ءسوز قىزمەتى تاراتقان اقپاراتتا.
جىل باسىنان بەرى احمەت بايتۇرسىن ۇلىنىڭ ەسىمى رەسپۋبليكامىزداعى 1 اۋىلعا، 200-دەن استام كوشەگە جانە 39 مەكتەپكە، 1 اۋەجايعا، 1 مۋزەيگە بەرىلگەن.
«بۇگىندە ءبىز ۇلت ۇستازى، قازاق ءتىل ءبىلىمىنىڭ اتاسى، ءتول ءالىپبيىمىزدىڭ نەگىزىن قالاۋشى احمەت بايتۇسىن ۇلىنىڭ 150 جىلدىعىن اتاپ وتۋدەمىز. وكىنىشكە قاراي، كيەلى تورعايداعى بۇگىنگى تورقالى توي ءتىلسىز جاۋدىڭ كەسىرىنەن توقتاتىلىپ وتىر. كەشەلى بەرى قوستاناي حالقىنا قول ۇشىن سوزىپ جاتقان جانداردىڭ سانى ارتىپ كەلەدى. بۇل – بىرلىگىمىز بەن ىنتىماعىمىزدىڭ بەلگىسى. حالقىمىز قانداي قيىندىقتى دا وسىنداي بىرلىكپەن ەڭسەرگەن. ەڭ باستىسى، ەل امان بولىپ، ۇلى تويدىڭ قايتا جاڭعىرۋىنا تىلەكتەسپىن»، – دەدى ق ر مادەنيەت جانە سپورت ءمينيسترى داۋرەن ابايەۆ.