ەندى مەكتەپ وقۋشىلارى قازاقستان تاريحىن ق ر ۇلتتىق مۋزەيىندە وقي الادى.
مادەنيەت جانە سپورت ءمينيسترى داۋرەن ابايەۆ «مۋزەيدەگى وقۋ كۇنى» اتتى جاڭا مادەني-بىلىم بەرۋ جوباسىنىڭ باستالعانى تۋرالى حابارلادى. ساباقتىڭ تاقىرىبى مەن مازمۇنى وقۋ باعدارلاماسىنا تولىق سايكەس كەلەدى، دەپ حابارلايدى Almaty-akshamy.kz.
جوبا 5-9 سىنىپ وقۋشىلارىنىڭ قوعامدىق-گۋمانيتارلىق پاندەر بويىنشا تەوريالىق بىلىمدەرىن بەكىتۋگە باعىتتالعان.
«بالالار ءتول تاريحىمىزدى مۋزەي ەكسپوناتتارىنىڭ كومەگىمەن زەرتتەيتىن بولادى، بۇل - بالالار ءۇشىن دە، پەداگوگتار ءۇشىن دە تاماشا مۇمكىندىك. زەرتتەۋشى عالىمدار، ق ر ۇلتتىق مۋزەيىنىڭ ەكسكۋرسيا جەتەكشىلەرى ورتا مەكتەپتىڭ تاريح ءپانىنىڭ مۇعالىمدەرىمەن بىرلەسىپ، گەيميفيكاسيا ەلەمەنتتەرىن قولدانا وتىرىپ، ينتەراكتيۆتى ساباقتار وتكىزەدى. ساباق بارىسىندا وقۋشىلار ەكسپوناتتارمەن جاقىنىراق تانىسىپ، ارتەفاكتىلەردىڭ كوشىرمەلەرىن قولدا ۇستاي الادى»، - دەپ اتاپ ءوتتى ق ر مادەنيەت جانە سپورت ءمينيسترى داۋرەن ابايەۆ.
ساباقتار مۋزەيدىڭ ەكسپوزيسيا زالدارىندا وتەدى. ءبىر ءدارىستىڭ ۇزاقتىعى 35-45 مينۋتتى قۇرايدى. ەلىمىزدىڭ باسقا قالالارىنىڭ وقۋشىلارى ءۇشىن مۋزەي ساباقتارى جاقىن ارادا ونلاين فورماتتا قولجەتىمدى بولادى. ول ءۇشىن مۋزەي قىزمەتكەرلەرى ۆيدەوساباقتار دايىنداعان.
ايتا كەتەيىك، جوبا بالالار جىلى اياسىندا جۇزەگە اسىپ وتىر.