بيىل ۇلت ۇستازى، مەملەكەت جانە قوعام قايراتكەرى، عالىم-رەفورماتور - احمەت بايتۇرسىن ۇلىنىڭ تۋعانىنا 150 جىل تولدى.
2022 جىلعى 11 قاراشا كۇنى، ساعات 10.00-دە الماتى قالاسى اكىمدىگىنىڭ قولداۋىمەن الماتى قالاسى مۋزەيلەر بىرلەستىگىنىڭ ۇيىمداستىرۋىمەن دوستىق ءۇيىنىڭ عيماراتىندا (الماتى قالاسى، قۇرمانعازى كوشەسى 40) «احمەت بايتۇرسىن ۇلى – ۇلت ۇستازى» اتتى حالىقارالىق عىلىمي-تاجىريبەلىك كونفەرەنسيا وتەدى، - دەپ حابارلايدى almaty-akshamy.kz
كونفەرەنسيانىڭ ماقساتى – وتاندىق جانە شەتەلدىك عالىمداردىڭ قاتىسۋىمەن احمەت بايتۇرسىن ۇلى مۇرالارىن جان-جاقتى عىلىمي تالداۋ، احمەتتانۋ عىلىمىنىڭ وزەكتى ماسەلەلەرىن تالقىلاۋ، سوڭعى كوزقاراستار مەن جاڭا تۇجىرىمدارعا جول اشۋ.
كونفەرەنسياعا وتاندىق جانە الىس-جاقىن شەتەلدەردەن 100-دەن استام عالىم-زەرتتەۋشىلەر قاتىسادى. ونىڭ ىشىندە پروفەسسور نەرگيز بيراي، پروفەسسور گۇلجانات ەردجيلاسۋن، بەكىر تۇمەن سومىنجى ۇلى (تۇركيا)، دوكتور Phd وزگەجان كيسيجي (گەرمانيا)، پروفەسسور حيساو كوماسۋ (جاپونيا)، پروفەسسور كيم ساڭ چول (كورەيا)، پروفەسسور ماحانبەت ءجۇسىپوۆ، باحروم يرزايەۆ (وزبەكستان)، دوسەنت زۋحرا التىمىشيەۆا (قىرعىزستان) سەكىلدى عالىمدار بايانداما جاسايدى.
سونىمەن قاتار، 12 تومدىق احمەت بايتۇرسىن ۇلىنىڭ شىعارمالار جيناعى جانە تۇركياداعى پامۋككالە ۋنيۆەرسيتەتىنىڭ پروفەسسورى، الاشتانۋشى عالىم نەرگيز بيرايدىڭ احمەت بايتۇرسىن ۇلى تۋرالى زەرتتەۋ كىتابى سەكىلدى ەكى بىردەي سۇبەلى ەڭبەكتىڭ تۇساۋى كەسىلەدى.