الماتى قۇتقارۋشىلارى جىلىتۋ ماۋسىمىندا ءورت قاۋىپسىزدىگىنە ساق بولۋدى ەسكەرتەدى.
الماتى قالاسىنىڭ قۇتقارۋشىلارى وڭىرلىك كوممۋنيكاسيالار قىزمەتىنىڭ الاڭىندا باسپا ءسوز كونفەرەنسياسىن وتكىزدى. ونىڭ بارىسىندا جىلىتۋ ماۋسىمىمەن بىرگە ءورت ءقاۋپى تۋىندايتىن جاعدايلار تۋرالى ايتتى، دەپ حابارلايدى Almaty-akshamy.kz.
ءورت سانىنىڭ ازايعانىنا قاراماستان، بيىل گاز قۇرىلعىلارىن تۇرمىستا پايدالانۋ كەزىندە 4 قايعىلى وقيعا تىركەلگەنى بەلگىلى.
تجد مالىمەتى بويىنشا، تابيعي گازدان 5 ادام ۋلانعان (ونىڭ ىشىندە 3 بالا)، تاعى بەس ادامدى ءارتۇرلى دارەجەدەگى كۇيىك شالعان.
وكق بريفينگىندە ولار بيىلعى جىلدىڭ 2 قازانىندا مەدەۋ اۋدانىندا جەكە تۇرعىن ۇيلەردىڭ بىرىندە (ونىڭ جەرتولەسىندە) ءۇي ىشىندەگى مۇرجا اقاۋىنىڭ سالدارىنان (مۇرجا بولشەكتەلگەن كۇيدە) بەس ادام تابيعي گازدان ۋلانعان، ونىڭ ەكەۋى 2019 جانە 2022 جىلى تۋىلعان بالالار. ابىروي بولعاندا، اۋرۋحانادا مەديسينالىق كومەك كورسەتىلگەننەن كەيىن ولار ۇيلەرىنە شىعارىلدى.
وسىعان ۇقساس تاعى ءبىر وقيعا 31 قازاندا الاتاۋ اۋدانىندا 2 قاباتتى جەكە تۇرعىن ۇيدە بولدى، 5 ادام كوگىلدىر وتىننان ۋلانعان، ونىڭ ىشىندە ۇشەۋى 2014، 2012، 2021 جىلى تۋىلعان بالالار) تەكسەرىلىپ، مەديسينالىق كومەك كورسەتىلگەننەن كەيىن ولار ۇيلەرىنە جىبەرىلگەن.
مەملەكەتتىك ءورتتى باقىلاۋ باسقارماسىنىڭ باسشىسى دانيار ءجۇسىپوۆ مەگاپوليس تۇرعىندارىنا گاز باللوندارى مەن گاز جابدىقتارىن تەك وسى ونىمدەردى ساتۋعا سەرتيفيكاتتارى بار مامانداندىرىلعان ۇيىمداردان ساتىپ العان دۇرىس ەكەنىن ايتتى.
«مامانداردىڭ قىزمەتىنە جۇگىنە وتىرىپ، جىل سايىن گاز جابدىقتارىن مىندەتتى تۇردە تەكسەرۋ كەرەك. جەلدەتۋ قۇبىرلارىنىڭ جارامدى ىستەپ تۇرعان-تۇرماعانىن باقىلاۋ كەرەك، بولمەنى ۇنەمى جەلدەتۋ كەرەك، اسىرەسە ۇيقىعا جاتار الدىندا. گاز قۇرىلعىلارىن پايدالانۋ كەزىندە قاۋىپسىزدىك شارالارىن ساقتاۋ، سونىمەن قاتار جيھازدى جانە باسقا دا جانعىش زاتتاردى جىلىتۋ پەشتەرى مەن گاز قۇرىلعىلارىنىڭ جانىنا قويماۋ، كيىمدەر مەن وتىندى كەپتىرمەۋ وتە ماڭىزدى»، - دەدى قۇتقارۋشى.
دانيار ءجۇسىپوۆ قالادا جىلىتۋ ماۋسىمى باستالعالى جەكە سەكتوردا ورتكە قارسى قاۋىپسىزدىكتى باقىلاۋ شارالارى كۇشەيتىلگەنىن ايتتى.
«الماتى قۇتقارۋشىلارى جەكە سەكتوردى تەكسەرۋ بارىسىندا ءورت قاۋىپسىزدىگىنىڭ 90-عا جۋىق بۇزۋشىلىعىن انىقتادى. ونداعان ءۇيدىڭ جاعدايى ناشار بولعاندىقتان، مۇرجالاردى تازالاۋ، پەشتەگى جارىقتاردى جوندەۋ، ەلەكتر سىمدارىن اۋىستىرۋ، كومىرقىشقىل گازىن انىقتاۋ قۇرىلعىلارىن ورناتۋ جانە باسقا دا شارالار جاساۋ قاجەت بولدى. حالىقتىڭ الەۋمەتتىك وسال توپتارىنا ەرەكشە كوڭىل ءبولىندى. ماسەلەن، تىزىمدەر تۇزەتىلىپ، 792 تۇرعىن ءۇي ەسەپكە الىندى. وسىعان بايلانىستى، قىركۇيەك ايىندا «كومەك قولى» اكسياسى ۇيىمداستىرىلىپ، ونىڭ بارىسىندا از قامتىلعان وتباسىلارعا گاز داچيكتەرى ورناتىلدى، بۇرىن ورناتىلعان داچيكتەردىڭ باتارەيالارى اۋىستىرىلدى، باسقا دا ورتكە قارسى جانە پروفيلاكتيكالىق كومەكتەر كورسەتىلدى»، - دەدى دانيار ءجۇسىپوۆ.
سونىمەن قاتار، بيىل 151 934 جەكە تۇرعىن ءۇي ەسەپكە الىنعان، ونىڭ ىشىندە 1205 ءۇي قاتتى وتىنمەن جىلىتىلادى. بۇگىنگى كۇنى ولار 100% تەكسەرۋدەن ءوتتى.
بريفينگكە الماتى قالاسى توتەنشە جاعدايلار دەپارتامەنتى مەملەكەتتىك ءورتتى باقىلاۋ باسقارماسىنىڭ باس مامانى قايىرجان اقشايىقوۆ تا قاتىستى. ونىڭ ايتۋىنشا، 2018 جىلدان بەرى حالىقتىڭ الەۋمەتتىك جاعىنان وسال توپتارىنىڭ 1340 ءۇي گاز يىسىنەن قورعايتىن داچيكتەرمەن جابدىقتالعان.
«يىستەن قورعايتىن داچيكتەردىڭ ارقاسىندا ادام ءومىرىن ساقتاپ قالعان ەكى جاعداي بولدى»، - دەدى سپيكەر.
جۋرناليستەردىڭ سۇراقتارىنا جاۋاپ بەرگەن ولار گاز يىسىنەن ۋلانۋ بەلگىسى باس اۋرۋى، السىزدىك، باس اينالۋ، ەستۋ جانە كورۋ قابىلەتىنىڭ تومەندەۋى، جۇرەك اينۋ تۇرىندە كورىنەتىنىن ايتتى. قاتتى ءيىس ءتيىپ اۋىرعان ادام ەسىنەن تانىپ قالۋى مۇمكىن، تەرىسى بوزارىپ، تىرىسقاق پايدا بولادى. اقىر سوڭىندا، جۇرەك پەن تىنىس الۋدىڭ توقتاۋىنان ادام ءولىپ كەتۋى مۇمكىن. مۇنداي جاعدايدا زارداپ شەگۋشىگە العاشقى كومەكتىڭ دۇرىس كورسەتىلگەگى وتە ماڭىزدى.
«ادامدى تازا اۋاعا شىعارىپ، اياعىن جوعارى كوتەرىپ جاتقىزۋ كەرەك، تار كيىمىن بوساتىپ، ءمۇساتىر ءسپيرتىن يىسكەتۋ كەرەك. ەگەر زارداپ شەگۋشى تىنىس الماسا، قولدان دەم الدىرۋ كەرەك. مىندەتتى تۇردە جەدەل جاردەم شاقىرۋ قاجەت. ەگەر بۇل مۇمكىن بولماسا، ادام وز-وزىنە كەلگەننەن كەيىن زارداپ شەگۋشىنى مەديسينالىق مەكەمەگە جەتكىزۋگە تىرىسۋ كەرەك»، - دەيدى قۇتقارۋشىلار.