سول كەزدە احمەت بايتۇرسىن ۇلى ەكى كوميسسياعا مۇشە بولعان
«احاڭ ءجۇرىپ وتكەن جولمەن» ەكسپەديسياسىنىڭ ناتيجەسىندە احمەت بايتۇرسىن ۇلىنىڭ ۆيدەوسى تابىلدى. مۇنداي جاڭالىقپەن عىلىمي ەكسپەديسيانىڭ مۇشەسى ابىلاي ماۋدانوۆ ءبولىستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«احاڭ ءجۇرىپ وتكەن جولمەن» ەكپەديسياسى اياسىندا احمەت بايتۇرسىن ۇلىنىڭ تابانى تيگەن جەرلەردىڭ بارلىعىنا جولعا شىقتىق. ونىڭ ىشىندە باكۋگە دە باردىق. وندا تۇركولوگتاردىڭ بۇكىلوداقتىق ءى سەزى وتكەن عيماراتقا سوقتىق. دەگەنمەن ولار بىزگە قاعازعا ءتۇسىرىلىپ، عالامتورعا جاريالانىپ، كىتاپقا ەنگەن بارشاعا بەلگىلى دەرەكتەردى عانا ۇسىندى. ءبىراق اۋديو جانە بەينەماتەريالدار ساقتالماعان ەكەن. كەيىن ءازىربايجان ۇلتتىق-عىلىمي ورتالىعىنىڭ قىزمەتكەرىمەن بايلانىسىپ كوردىك. ولار ۆيدەولار بار ەكەنىن جەتكىزدى. الايدا، ونى الۋ ءۇشىن رەسمي حات جازۋ كەرەك بولدى. ءبىز ەكسپەديسيادان سوڭ ەلگە ورالىپ، حات جازۋعا كىرىستىك. ناتيجەسىندە اتالعان ورتالىق بىزگە ۇزاقتىعى 7 مينۋت 55 سەكۋند بولاتىن بەينەماتەريالدى جولدادى. ۆيدەونىڭ ىشىندەگى ءبىر كادر كوزگە شالىندى. تاسپاعا سىرت كەلبەتى احمەت بايتۇرسىنۇلىنا ۇقسايتىن ادام تۇسىرىلگەن ەكەن»، - دەدى ەكسپەديسيا مۇشەسى ابىلاي ماۋدانوۆ.
ونىڭ ايتۋىنشا، بەينەماتەريالداعى ادامنىڭ احمەت بايتۇرسىن ۇلى ەكەنىن راستاۋ ءۇشىن ۆيدەو الاشتانۋشى جانە احمەتتانۋشى عالىمدارعا جولدانعان. ولاردىڭ بارلىعى ءبىر سەكۋندتىق كادردا كورسەتىلگەن ازاماتتىڭ ۇلت ۇستازى ەكەنىن راستاپتى.
«احمەتتانۋشىلاردىڭ ايتۋىنشا، سول كەزدە احمەت بايتۇرسىن ۇلى ەكى كوميسسياعا مۇشە بولعان. سوندىقتان ول پرەزيديۋمدا وتىرۋعا ابدەن لايىق. ۆيدەونى قاراساڭىز، ول الدىڭعى قاتاردا وتىر. بۇل سول كەزدەگى احاڭنىڭ بەدەلدى، تانىمال كىسى بولعانىن ايعاقتايدى. كەيىن، 31 تامىز كۇنى، بەينەماتەريالدى قوستانايداعى سوت-ساراپتاما ينستيتۋتىنا اپاردىق. ولار: ۆيدەوداعى ادامنىڭ سۇلباسى 1926 جىلعى تۇسكەن احمەت بايتۇرسىن ۇلىنىڭ سۋرەتىنە ۇقسايدى، دەگەن جاۋاپ بەردى»، - دەپ جۇمىستاردىڭ ناتيجەسىمەن ءبولىستى ابىلاي ماۋدانوۆ.
«احاڭ ءجۇرىپ وتكەن جولمەن» عىلىمي ەكسپەديسياسىنىڭ ناتيجەسىندە ۇلت ۇستازىنىڭ ءومىرى مەن اتقارعان ەڭبەگى تۋرالى تىڭ دەرەكتەر جيناقتالىپ، قۇجاتتار وڭىرلىك مۇراجايعا تابىستالعان. سونداي-اق، احمەت بايتۇرسىن ۇلىنىڭ تۋعان جەرى تورعايدا وتەتىن 150 جىلدىق مەرەيتويى اياسىندا كورسەتىلەتىن دەرەكتى فيلم ازىرلەندى.