قازاقستاندا 5 شىلدەدەن باستاپ جاڭا ايىپپۇل كۇشىنە ەنەدى، دەپ حابارلايدى aqshamnews.kz
2025 جىلعى 17 ماۋسىمدا "وسىمدىكتەر دۇنيەسىن كۇزەتۋ، قورعاۋ، قالپىنا كەلتىرۋ جانە پايدالانۋ سالاسىنداعى زاڭناماسىن بۇزۋدان كەلتىرىلگەن زياننىڭ مولشەرلەرىن ەسەپتەۋگە ارنالعان بازالىق مولشەرلەمەلەردى بەكىتۋ تۋرالى" ەكولوگيا جانە تابيعي رەسۋرستار ءمينيسترىنىڭ بۇيرىعى شىقتى.
بۇل قۇجات اعاشتار مەن بۇتالاردى زاڭسىز كەسكەن قازاقستاندىقتاردىڭ جاۋاپكەرشىلىگىن بەلگىلەيدى. بۇيرىقتىڭ كەي پۋنكتتەرى اعاش پەن بۇتانىڭ سيرەك كەزدەسەتىن جانە جويىلىپ بارا جاتقان تۇرلەرىنە عانا ەمەس، سونىمەن قاتار قاراپايىم اۋلادا وسەتىن وسىمدىكتەر دۇنيەسىنە دە قاتىستى.
مىسالى، كەلەسىدەي اعاش پەن بۇتا تۇرلەرى بۇيرىقپەن قورعالعان، ولاردى كەسۋ نەمەسە زاقىمداعاندار ءىرى مولشەردە ايىپپۇل ارقالايدى:
قاراعاي، شىرشانىڭ بارلىق ءتۇرى، بالقاراعاي – اعاشتىڭ جاسىنا بايلانىستى 15-تەن 45 اەك-كە دەيىن (2025 جىلعا 58 980 تەڭگەدەن 176 940 تەڭگەگە دەيىن) ايىپپۇل سالىنۋى مۇمكىن؛
سامىرسىن – ايىپپۇل 17-دەن 47 اەك-كە دەيىن (66 844 تەڭگەدەن 184 804 تەڭگەگە دەيىن) بولادى؛
اعاش تەكتەس ارشا – 14-تەن 44 اەك-كە دەيىن (55 048 تەڭگەدەن 173 008 تەڭگەگە دەيىن)؛
ۇيەڭكى، شەگىرشىن، جوكە، كوكتەرەك، اعاش تەكتەس تال، تەرەك – 10-نان 40-قا دەيىن انىقتالماعان اەك (بۇل 39 320 تەڭگەدەن 157 280 تەڭگەگە دەيىن)؛
قايىڭ، ارشا، ەرگەجەيلى قاراعاي – ايىپپۇل 12-دەن 42 اەك-كە دەيىن (47 184 تەڭگەدەن 165 144 تەڭگەگە دەيىن)؛
گرەك جاڭعاعى اعاشى، شەكىلدەۋىك جاڭعاق اعاشى – 50-دەن 80 اەك-كە دەيىن (196 600 تەڭگەدەن 314 560 تەڭگەگە دەيىن)؛
ورىك، اق قاراعان، الشا، دولانا، شيە، جيدە، شەتەن، الحورى، مويىل، تۇت اعاشى، جابايى الما – 10-نان 40 اەك-كە دەيىن (39 320 تەڭگەدەن 157 280 تەڭگەگە دەيىن)؛
سارى قاراعان، بۇتا تەكتەس تالدار، شىرعاناق، باسقا دا اعاش تۇرلەرى مەن بۇتالاردى كەسۋ جانە زاقىمداعانى ءۇشىن 9-دان 39 اەك-كە دەيىن ايىپپۇل (35 388 تەڭگەدەن 153 348 تەڭگەگە دەيىن) تولەۋگە تۋرا كەلەدى.
جاڭا بۇيرىق 2025 جىلدىڭ 5 شىلدەسىنەن باستاپ كۇشىنە ەنەدى. سوندىقتان وسىمدىكتەردىڭ كەز كەلگەن ءتۇرىن كەسۋ نەمەسە جويۋ الدىندا ءوز ارەكەتتەرىڭىزدىڭ زاڭدى ەكەنىنە كوز جەتكىزىپ، ءتيىستى قالالىق قىزمەتتەرگە حابارلاسىڭىز.