دۇنيەجۇزىلىك دەنساۋلىق ساقتاۋ ۇيىمى دابىل قاعۋدا
سەبەبى افريكا ەلدەرى كوروناۆيرۋسقا قارسى ۆاكسينالاۋ جوسپارىن ىسكە اسىرىپ ۇلگەرمەۋى مۇمكىن. نەگىزگى جوسپار بويىنشا 2024 جىلدىڭ ەكىنشى جارتىسىنا دەيىن قۇرلىق حالقىنىڭ 70 پروسەنتى ەكپە سالدىرۋ كەرەك. الايدا پرەپارات بارلىعىنا بىردەي قولجەتىمدى ەمەس. سونىڭ سالدارىنان ءقازىر افريكادا ۆاكسينانىڭ ەكى دوزاسىن دا قابىلداعانداردىڭ ۇلەسى 8 پروسەنتكە دە جەتپەيدى، دەپ حابارلايدى Almaty-akshamy.kz 24.kz-كە سىلتەمە جاساپ.
ول ازداي، مۇندا "وميكرون" تەز تاراپ بارادى. جاڭا شتامدى جۇقتىرۋدىڭ العاشقى دەرەكتەرى وسى قۇرلىقتا تىركەلگەن. ءقازىر وڭتۇستىك افريكا رەسپۋبليكاسىندا "وميكرون" باسىم شتامعا اينالعان.
«ۆاكسينالاۋ قارقىنىن ارتتىرۋ ارقىلى ءبىز مىڭداعان ادامنىڭ ءومىرىن ساقتاپ قالا الامىز. ءقازىر "وميكرون" تەز تاراپ جاتىر. ال افريكا حالقىنىڭ كوبى ەكپە سالدىرماعان. قۇرلىقتاعى ەكى ەل – ماۆريكيي مەن سەيشەل ارالدارىندا عانا حالىقتى ۆاكسينالاۋ دەڭگەيى جوعارى. ولاردا كورسەتكىش 70 پروسەنتتەن اسىپ كەتتى. الايدا باسقالارىنداعى جاعداي كۇردەلى. افريكاداعى 10 مەملەكەتتە ۆاكسينا قابىلداعان حالىقتىڭ ۇلەسى 2 پايىزعا دا جەتپەيدى»، - دەيدى ددسۇ وكىلى فيونا اتۋحەبۆە.