اتوم ەلەكتر ستانسيالارىنىڭ قاۋىپسىزدىك جانە قورشاعان ورتاعا اسەرى تۋرالى سۇراقتارعا بايلانىستى قازاقستان رەسپۋبليكاسى ۇلتتىق يادرولىق ورتالىعى ديرەكتورىنىڭ ورىنباسارى ەربولات قويانبايەۆ زاماناۋي اەس رەاكتورلارىنىڭ ەكى كونتۋرلى سالقىنداتۋ جۇيەسىمەن جابدىقتالعانىن اتاپ ءوتتى.
"ەكى كونتۋر گيدراۆليكالىق تۇرعىدان بىر-بىرىنەن وقشاۋلانعان جانە تەك جىلۋ الماستىرعىش ارقىلى بايلانىسقان. بۇل پروسەسس تۇراقتى باقىلاۋدا بولادى. ودان بولەك، كوندەنساتوردى سالقىنداتۋ ءۇشىن قولدانىلاتىن سۋ تىكەلەي كولدەن ەمەس، ارنايى پرۋدتان الىنادى، ياعني قورشاعان ورتاعا اسەر ەتۋ مۇمكىندىگى بارىنشا ازايتىلادى،" – دەدى قويانبايەۆ.
ونىڭ ايتۋىنشا، ەكى بلوكتى اەس جىل سايىن ءداستۇرلى گراديرەندەردى پايدالانعاندا شامامەن 0،063 ميلليارد تەكشە مەتر سۋ قاجەت ەتەدى. بۇل كولەمدى قازاقستاننىڭ ءىرى وزەندەرى مەن سۋ قويمالارى وڭاي قامتاماسىز ەتە الادى. مىسالى، بالقاش كولىنىڭ كولەمى 108 ميلليارد تەكشە مەتردى قۇرايدى، ال اەس-تىڭ جىلدىق سۋ قاجەتتىلىگى ىلە وزەنىنىڭ جىلدىق نورماسىنىڭ 1%-ىن قۇرايدى.
"سونىمەن قاتار، كەيبىر جوبالاردا ءداستۇرلى گراديرەندەردىڭ ورنىنا سۋ شىعىنىن تالاپ ەتپەيتىن قۇرعاق گراديرەندەر قولدانىلادى. بۇل شەشىم سۋ رەسۋرستارىن ءتيىمدى پايدالانۋعا مۇمكىندىك بەرەدى،" – دەپ قوستى ەربولات قويانبايەۆ.
بۇل مالىمدەمە اەس سالۋ تۋرالى كوپشىلىكتى مازالاعان ەكولوگيالىق قاۋىپتەردى سەيىلتۋگە باعىتتالعان جانە ستانسيانىڭ قورشاعان ورتاعا اسەرى ەڭ تومەنگى دەڭگەيدە بولاتىنىن كورسەتەدى. قازاقستاننىڭ تۇراقتى ەنەرگەتيكا سالاسىنا باعىتتالعان قادامى ۇزاق مەرزىمدى پەرسپەكتيۆادا ەكولوگيا مەن ەكونوميكاعا وڭ اسەرىن تيگىزبەك.