اەس سالۋدى قولداۋ جونىندەگى حالىقتىق شتابتىڭ وڭىرلەرگە ساپارى جالعاسۋدا. بۇگىن شتاب مۇشەلەرى سولتۇستىك قازاقستان وبلىسىنا بارىپ، جەرگىلىكتى شارۋالارمەن، بەلسەندى ازاماتتارمەن جانە عىلىمي-ساراپتامالىق قوعامداستىق وكىلدەرىمەن بىرنەشە كەزدەسۋ وتكىزدى، دەپ حابارلايدى aqshamnews.kz
چاپايەۆ اۋىلىنداعى «قىزىلجار ءسۇت» ج ش س الاڭىندا وتكەن كەزدەسۋدە شتاب مۇشەلەرى وڭىردەگى اۋىل شارۋاشىلىعى تاۋارىن وندىرۋشىلەرمەن پىكىر الماستى. سوڭعى بەس جىلدا سقو-دا ءسۇت ءوندىرىسى 100 مىڭ توننادان استامعا ءوسىپ، بۇگىندە ەلدە وندىرىلەتىن ءسۇتتىڭ 10%-دان استامى وسى وڭىردە وندىرىلەدى. سونىمەن قاتار، «اۋىل اماناتى» جوباسى اياسىندا ءوڭىر تۇرعىندارى جالپى سوماسى 79 ملرد تەڭگەنى قۇرايتىن 12،7 مىڭ نەسيە الىپ، ول قاراجات مال ساتىپ الۋ، شارۋا قوجالىقتارىن دامىتۋ، جىلىجايلار سالۋ جانە تەحنيكانى جاڭارتۋعا باعىتتالدى. بۇل جوبالار تۇراقتى ءارى مول ەلەكتر ەنەرگياسىن قاجەت ەتەدى.
ءماجىلىس دەپۋتاتى، «AMANAT» پارتياسى فراكسياسىنىڭ جەتەكشىسى ەلنۇر بەيسەنبايەۆ اەس سالۋدىڭ اۋىل شارۋاشىلىعىن دامىتۋداعى ستراتەگيالىق ماڭىزىن اتاپ ءوتتى. ول اتوم رەاكتورلارىنىڭ تەكسەرىلگەن جانە سەنىمدى ەنەرگيا كوزى رەتىندە الدىڭعى قاتارلى ەلدەردىڭ تاجىريبەسىنە سۇيەنە وتىرىپ، قازاقستاننىڭ دا وسى باعىتتا دامۋ كەرەكتىگىن ايتتى.
«اتوم رەاكتورلارى الەمنىڭ كوپتەگەن ەلدەرىندە سەنىمدى ەنەرگيا كوزى رەتىندە كەڭىنەن قولدانىلادى. قازاقستان ۋران قورى بويىنشا الەمدە 2-ورىندا، ال ونى وندىرۋدە 1-ورىندا تۇر. اەس تۇراقتى ەنەرگيا كوزى رەتىندە اپاتتىق جاعدايلاردى بولدىرماۋعا جانە ەلىمىزدىڭ ەنەرگەتيكالىق تۇراقتىلىعىن قامتاماسىز ەتۋگە مۇمكىندىك بەرەدى. بۇل، ءوز كەزەگىندە، اۋىل شارۋاشىلىعىنىڭ ودان ءارى دامۋىنا جول اشادى»، – دەدى ول.
كەزدەسۋدە شارۋالار دا اەس قۇرىلىسىنا قولداۋ ءبىلدىرىپ، ونىڭ كاسىپورىنداردىڭ تۇراقتى جۇمىس ىستەۋى ءۇشىن سەنىمدى ەنەرگيامەن قامتاماسىز ەتەتىنىن جانە اگروونەركاسىپ كەشەنىنىڭ دامۋىنا ىقپال ەتەتىنىن اتاپ ءوتتى.