قىزىلوردا ايماقتىق حالىقتىق شتاب وكىلدەرى «جىبەك جولى» ساۋدا ۇيىندە ازاماتتارمەن ەركىن كەزدەسىپ، اەس سالۋدىڭ ماڭىزدىلىعى تۋرالى كەڭىنەن ءتۇسىندىردى. كەزدەسۋ بارىسىندا تۇرعىنداردىڭ سۇراقتارىنا جاۋاپ بەردى.
شتاب مۇشەسى بەيبىتكۇل كاريموۆا ستۋدەنتتەرمەن اڭگىمەلەسۋ بارىسىندا اتوم ەنەرگەتيكاسىنىڭ ەلىمىزدىڭ ەنەرگەتيكالىق قاۋىپسىزدىگى ءۇشىن ماڭىزىن اتاپ ءوتتى:
«بۇگىندە تۇراقتى جانە ءقاۋىپسىز ەنەرگيامەن قامتاماسىز ەتۋ بارلىق مەملەكەتتەر ءۇشىن ستراتەگيالىق ماسەلە. حالىقارالىق ساراپشىلاردىڭ پىكىرىنشە، اتوم ەنەرگەتيكاسى ەلدىڭ ەنەرگەتيكالىق قاۋىپسىزدىگىن قامتاماسىز ەتۋدىڭ نەگىزگى قۇرالى بولىپ تابىلادى. ءداستۇرلى جانە جاڭارتىلاتىن ەنەرگيا كوزدەرى تۇراقتى ءوندىرىس بەرە المايدى، سوندىقتان ەلىمىزدە بەيبىت اتوم ەنەرگياسىن قولدانۋ باعىتىندا عالىمدار كوپ جۇمىس اتقارۋدا. قازاقستاندا اتوم سالاسىندا 17،9 مىڭ ادام جۇمىس ىستەيدى، ونىڭ ىشىندە «قازاتومونەركاسىپ» ۇاك» اق-دا – 15 مىڭعا جۋىق جۇمىسشى بار. اتوم ونەركاسىبىندەگى ستۋدەنتتەردىڭ سانى 9 مىڭعا جەتەدى»، – دەدى ول.
كەزدەسۋ بارىسىندا جاستار دا قالىس قالمادى. ولار شتاب مۇشەلەرىنەن ەنەرگيا تاريفتەرى مەن شيكىزات ماسەلەلەرى تۋرالى سۇراقتار قويدى. بۇل سۇراقتارعا شتاب مۇشەسى گۇلشات مۇسايەۆا جاۋاپ بەردى.
«اتوم ەلەكتر ستانسياسىندا وندىرىلەتىن ەلەكتر ەنەرگياسىنىڭ قۇنى باسقا ەنەرگيا كوزدەرىمەن سالىستىرعاندا جوعارى بولمايدى، سەبەبى وتىننىڭ باعاسى تۇراقتى، ەنەرگيا سىيىمدىلىعى جوعارى جانە ستانسانىڭ قىزمەت ەتۋ مەرزىمى 60 جىلعا سوزىلادى، ونى 80 جىلعا دەيىن ۇزارتۋ مۇمكىندىگى بار. قازاقستان تابيعي ۋراننىڭ بارلانعان قورى بويىنشا الەمدە ەكىنشى ورىندا. بارلىق الەمدىك قورلاردىڭ 14%-عا جۋىعى قازاقستاننىڭ تەرەڭ قويناۋىندا ورنالاسقان، ونىڭ 70%-ى ەكولوگيالىق تازا جەراستى سىلتىلەۋ ءادىسى ارقىلى وندىرىلەدى. بۇگىندە قازاقستان الەمدەگى ۋران ءوندىرىسىنىڭ شامامەن 40%-ىن قامتاماسىز ەتىپ، ۋران وندىرۋدە ءبىرىنشى ورىندا تۇر»، – دەدى گۇلشات مۇسايەۆا.
ەلىمىز اەس سالۋ ارقىلى ءوز ەنەرگەتيكالىق تاۋەلسىزدىگىن نىعايتۋعا جانە شەتەلدىك ەنەرگياعا تاۋەلدىلىكتى ازايتۋعا ۇلكەن مۇمكىندىك الادى.