ءماجىلىس سپيكەرى، «AMANAT» پارتياسىنىڭ ءتوراعاسى ەرلان قوشانوۆ اتوم ەلەكتر ستانسياسىنىڭ ەكونوميكانىڭ، ونەركاسىپتىڭ، ءبىلىمنىڭ جانە عىلىمنىڭ دامۋىنا تىڭ سەرپىن بەرەتىن اسا ماڭىزدى جوبا ەكەنىن ەرەكشە اتاپ ءوتتى. ونىڭ ايتۋىنشا، اەس ءتۇرلى تاۋەكەلدەردىڭ الدىن الىپ، ەلىمىزدى قۋاتتى ەنەرگەتيكالىق بازاسى بار پروگرەسسيۆتى مەملەكەتتەردىڭ قاتارىنا قوسۋعا ىقپال ەتەدى.
«اەس سالۋ – ءبىر كۇننىڭ ماسەلەسى ەمەس. جوبانى ىسكە اسىرۋ ون جىلدى، ءتىپتى ودان دا كوپ ۋاقىتتى الۋى مۇمكىن. سىزدەردىڭ بارلىعىڭىز دا ەكونوميكاسى دامىعان، بولاشاعى زور، قۋاتتى جانە تاۋەلسىز قازاقستاندا ءومىر سۇرگىڭىز كەلەتىنى ءسوزسىز. پرەزيدەنتىمىز قاسىم-جومارت توقايەۆتىڭ دا ماقساتى – وسى. قازىرگى قولعا الىنىپ جاتقان بارلىق ىستەر، ەڭ الدىمەن، سىزدەر ءۇشىن جاسالىپ جاتىر. ەندەشە، باتىل شەشىم قابىلدايتىن ۋاقىت كەلدى. ال باتىل شەشىمدى قابىلدايتىن – جاستار! ولاي بولسا، الداعى رەفەرەندۋمدا اەس سالۋعا قولداۋ ءبىلدىرىپ، ءوز بولاشاقتارىڭىز ءۇشىن دۇرىس تاڭداۋ جاساۋلارىڭىز قاجەت»، – دەدى ەرلان قوشانوۆ جاستارعا ارناعان سوزىندە.
اڭگىمەلەسۋ بارىسىندا حالىقتىق شتاب مۇشەلەرى اەس قۇرىلىسىنىڭ جاستارعا مول مۇمكىندىك بەرەتىنىن اتاپ ءوتتى. اتاپ ايتقاندا، لايىقتى جالاقىسى بار ونمىڭداعان جاڭا جوعارى بىلىكتى جۇمىس ورىندارى اشىلادى. قازاقستانداعى جوعارى وقۋ ورىندارىنىڭ تۇلەكتەرى اەس قۇرىلىسىنا قاتىسۋعا جانە وتاندىق اتوم يندۋسترياسىندا قىزمەت ەتۋگە بارلىق مۇمكىندىككە يە بولادى.
بولاشاقتا اتوم ەنەرگەتيكاسىن دامىتۋدىڭ مەملەكەتتىك باعدارلاماسى ازىرلەنىپ، وندا اەس قاجەتتىلىگىنە قاراي ارنايى كادر دايارلاۋعا ەرەكشە كوڭىل بولىنەدى.