اەس سالۋدى قولداۋ جونىندەگى حالىقتىق شتابتىڭ وڭىرلەردە حالىقپەن كەزدەسۋى جالعاسۋدا. شىمكەنت قالاسىندا شتاب مۇشەلەرى اتوم ەلەكتر ستانسياسىنىڭ ارتىقشىلىعى تۋرالى اڭگىمەلەستى.
قالا جاستارى اتىنان ەنەرگەتيكا جانە ءداستۇرلى ەمەس ەنەرگەتيكالىق جۇيەلەر كافەدراسىنىڭ PhD دوكتورى نۇرسۇلتان فايز، جاس عالىم يسابەك ءازىمحان، جاستار ورتالىعىنىڭ ديرەكتورى اقان بەسبايەۆ، ستۋدەنتتىك پارلامەنتتىڭ ءتوراعاسى سابينا ساعىنتاي اەس سالۋدى قولداۋ بويىنشا ءوز وي-پىكىرلەرىن ءبىلدىردى.
ولار قازاقستاننىڭ جاھاندىق پروگرەستەن تىس قالماۋى قاجەت ەكەنىن اتاپ ءوتىپ، اەس سالۋدىڭ ماڭىزدىلىعىنا نازار اۋداردى. اەس تەك ەنەرگيا كوزى بولۋمەن شەكتەلمەي، ەلىمىزدەگى عىلىم مەن تەحنولوگيانىڭ دامۋىنا سەرپىن بەرەتىن ءىرى جوبا بولاتىنىنا سەنىم ءبىلدىردى. اتوم ەلەكتر ستانسياسىنىڭ قۇرىلىسى مەن جۇمىس ىستەۋى جاستارعا ۇلكەن مۇمكىندىكتەر تۋدىراتىنىن، سونداي-اق جاڭا جۇمىس ورىندارى مەن عىلىمي زەرتتەۋلەردىڭ كەڭەيۋىنە جول اشاتىنىن ەرەكشە اتاپ ءوتتى.
نۇرسۇلتان فايز ءوز سوزىندە: «قازاقستاننىڭ ەنەرگەتيكالىق قاۋىپسىزدىگى مەن تۇراقتىلىعى ءۇشىن بىزگە اەس سەكىلدى ءىرى جوبالار قاجەت. بۇل جوبا تەك ەنەرگيامەن قامتاماسىز ەتۋمەن شەكتەلمەيدى، سونىمەن قاتار ەلىمىزدىڭ عىلىمي الەۋەتىن ارتتىرادى، جاڭارتىلعان تەحنولوگيالاردى ەنگىزۋگە مۇمكىندىك بەرەدى. جاستارعا بۇل جوبادا ۇلكەن ءرول بەرىلەدى، ويتكەنى ولار بولاشاقتىڭ ماماندارى، اەس سىندى جوعارى تەحنولوگيالىق نىسانداردى باسقاراتىن كادرلار بولادى»، – دەپ اتاپ ءوتتى.
يسابەك ءازىمحان: «اتوم ەنەرگەتيكاسى عىلىمنىڭ وزىق باعىتتارىنىڭ ءبىرى بولىپ تابىلادى. اەس سالۋ ەلىمىزگە الەمدىك دەڭگەيدە جاڭا تەحنولوگيالار مەن عىلىمي زەرتتەۋلەر جۇرگىزۋگە مۇمكىندىك بەرەدى. جاستاردىڭ بۇل سالادا ءوز ۇلەسىن قوسۋى وتە ماڭىزدى. اەس – بۇل جاڭا دەڭگەيدەگى عىلىم مەن تەحنيكانىڭ توعىسۋى، جانە ءبىز، جاستار، وسى پروسەستىڭ ورتاسىندا بولۋىمىز كەرەك»، – دەدى.
اقان بەسبايەۆ اەس-تىڭ جاستارعا بەرەتىن مۇمكىندىكتەرىنە توقتالىپ: «اەس سالۋ – بۇل ەلىمىزدىڭ بولاشاعىنا جاسالعان ينۆەستيسيا. جاڭا جۇمىس ورىندارى، جوعارى جالاقى جانە حالىقارالىق دەڭگەيدەگى تاجىريبە – بۇل جاستاردىڭ بولاشاعى ءۇشىن وتە ماڭىزدى. ءبىزدىڭ ەلدە وسىنداي ءىرى جوبالاردى جۇزەگە اسىرۋ ارقىلى ءبىز جاستاردىڭ بولاشاعىنا ۇلكەن مۇمكىندىك اشامىز»، – دەپ ويىن جەتكىزدى.
سابينا ساعىنتاي: «بىزدەر، ستۋدەنتتەر، قازاقستاننىڭ بولاشاعىنىڭ جارقىن بولۋىنا سەنەمىز. اەس تەك ەنەرگيا بەرىپ قانا قويمايدى، سونىمەن قاتار عىلىم مەن تەحنولوگيانى دامىتۋدىڭ كاتاليزاتورى بولماق. وسى سەبەپتى، ءبىز الداعى رەفەرەندۋمدا بۇل جوبانى قولدايمىز جانە اەس-تىڭ ەلىمىز ءۇشىن ستراتەگيالىق ماڭىزعا يە ەكەندىگىنە سەنىمدىمىز»، – دەدى.
جالپى، جاستار اەس سالۋ ارقىلى ەلىمىزدىڭ ەنەرگەتيكالىق تاۋەلسىزدىگىنە قول جەتكىزىپ، عىلىم مەن تەحنولوگيانىڭ جاڭا دەڭگەيىنە كوتەرىلۋىنە مۇمكىندىك بەرەتىنىن اتاپ ءوتىپ، بۇل جوبانى بەلسەندى تۇردە قولدادى.