قازاقستاندا اتوم ەلەكتر ستانسياسىن (اەس) سالۋ ماسەلەسىنە قاتىستى الداعى رەفەرەندۋم اياسىندا ءتۇرلى سۇراقتار كوتەرىلۋدە.
كەيبىرەۋلەر «ەلدەگى ەنەرگيا جەتكىلىكتى، تاپشىلىق جوق» دەپ سانايدى. الايدا، ەنەرگەتيكا مينيسترلىگىنىڭ بولجامى بويىنشا 2030 جىلعا قاراي ەلىمىزدە ەلەكتر ەنەرگياسىنىڭ تاپشىلىعى تۋىنداۋى مۇمكىن. بۇل تاپشىلىق شامامەن 6،2 گيگاۆاتتتى قۇرايدى، ال وندىرىلەتىن جانە تۇتىنىلاتىن ەنەرگيا اراسىنداعى ايىرماشىلىق 13،5 ميلليارد كيلوۆاتت-ساعاتقا جەتۋى مۇمكىن.
بۇگىنگى تاڭدا قازاقستان ەلەكتر ەنەرگياسىنىڭ قاجەتتىلىگىن قاناعاتتاندىرۋ ءۇشىن كورشى ەلدەردەن ەنەرگيا يمپورتتاۋدا. ونىڭ كولەمى 1،2 ميلليارد كيلوۆاتت-ساعات. سونىمەن قاتار، كوپتەگەن ەلەكتر ستانسيالارىنىڭ جابدىقتارى توزعان، كەيبىرى 90%-عا دەيىن ەسكىرگەن. وسى سەبەپتى اەس سالۋ قاجەتتىلىگى تۋىنداۋدا، بۇل — ەلدىڭ ەنەرگەتيكالىق تاۋەلسىزدىگى ءۇشىن ماڭىزدى قادام.
قازىرگى كەزدە كومىردەن الىناتىن ەنەرگيانى كوبەيتۋ قيىنعا سوعۋدا، سەبەبى حالىقارالىق قارجى ۇيىمدارى كومىر ەلەكتر ستانسيالارىن سالۋعا قارجى بولگىسى كەلمەيدى. گاز ستانسيالارىن سالۋ دا مۇمكىن ەمەس، ويتكەنى قازاقستاندا قاجەتتى گاز قورى جەتكىلىكسىز. وسى سەبەپتەن اتوم ەلەكتر ستانسياسى ەڭ قولايلى بالاما بولىپ سانالادى.
ەۋروپالىق وداق «لاس» ەنەرگيانى پايدالاناتىن وندىرىستەرگە ارنايى كاربون سالىعىن ەنگىزۋدى جوسپارلاپ وتىر. بۇل دەگەنىمىز، ەگەر ءبىزدىڭ زاۋىتتار كومىردەن الىناتىن ەنەرگيانى پايدالانسا، ولاردىڭ ونىمدەرى ەۋروپادا قىمباتتاۋى مۇمكىن. بۇل قازاقستاندىق تاۋارلاردىڭ باسەكەگە قابىلەتتىلىگىن تومەندەتەدى. سوندىقتان ءبىزدىڭ كاسىپورىنداردى تازا ەنەرگيامەن قامتاماسىز ەتۋ ارقىلى ولاردى حالىقارالىق نارىقتا باسەكەگە قابىلەتتى ەتۋىمىز قاجەت.
اتوم ەنەرگەتيكاسى — ەلىمىزدىڭ ەنەرگيا قاجەتتىلىگىن تۇراقتى قامتاماسىز ەتۋدىڭ جانە ەكونوميكانى دامىتۋدىڭ ەڭ ءتيىمدى شەشىمى. اەس سالۋ قازاقستاننىڭ ەنەرگەتيكالىق بولاشاعىن قامتاماسىز ەتۋگە جانە تاۋەلسىزدىكتى نىعايتۋعا مۇمكىندىك بەرەدى. كليماتتى قورعاۋ جانە كومىرتەك شىعارىندىلارىن نولگە جەتكىزۋ اتوم ەنەرگەتيكاسىنسىز مۇمكىن ەمەس.