«AMANAT» پارتياسىنىڭ ءتوراعاسى جۋىردا ۇكىمەتتىڭ اتوم ەنەرگەتيكاسى سالاسىندا كادر دايارلاۋ بويىنشا ارنايى باعدارلاما قابىلدايتىنىن مالىمدەدى. الداعى ءۇش جىلدا «بولاشاق» باعدارلاماسى اياسىندا الەمنىڭ ۇزدىك جوعارى وقۋ ورىندارىنا ءدال وسى سالاعا قاتىستى گرانتتار بولىنەدى، دەپ حابارلايدى aqshamnews.kz
ۋران ونەركاسىبى ماماندارىنا تاعىلىمداما جانە قايتا دايارلاۋ باعدارلامالارى ەنگىزىلىپ، بۇل شارالار اەس قۇرىلىسى اياقتالعان كەزدە 3 مىڭنان استام جوعارى بىلىكتى مامان دايارلاۋعا مۇمكىندىك بەرەدى. وسىعان بايلانىستى مۇعالىمدەردىڭ مىندەتى – وقۋشىلاردى ناقتى عىلىمدارعا قىزىقتىرىپ، ولاردىڭ بولاشاق ماماندىقتارىن تاڭداۋعا باعىت بەرۋ.
كەزدەسۋ بارىسىندا حالىقتىق شتاب مۇشەلەرى دە ءسوز الدى. ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ الەمدەگى اتوم ەنەرگەتيكاسىن دامىتۋ ۇردىستەرىن جانە قازاقستاندىق عىلىمي ازىرلەمەلەردىڭ ماڭىزىن اتاپ ءوتىپ، ەلىمىزدىڭ اەس سالۋعا تولىقتاي دايىن ەكەنىن ايتتى. ءماجىلىس دەپۋتاتى مۇقاش ەسكەندىروۆ ەنەرگەتيكالىق ماسەلەلەردى تەز ارادا شەشۋدىڭ ەل ەكونوميكاسىن دامىتۋ ءۇشىن اسا ماڭىزدى ەكەنىن ءتۇسىندىردى. يادرولىق فيزيكا ينستيتۋتىنىڭ ديرەكتورى سايابەك ساحييەۆ قازىرگى زامانعى ءۇشىنشى بۋىن يادرولىق رەاكتورلاردىڭ قاۋىپسىزدىگى، تيىمدىلىگى جانە ەكولوگيالىق تازالىعى تۋرالى حاباردار ەتتى.
حالىقتىق شتاب جەرگىلىكتى تەمىرجول قىزمەتكەرلەرىمەن دە كەزدەستى. ولار مەملەكەت باسشىسىنىڭ كولىك-لوگيستيكا سالاسىن دامىتۋعا ەرەكشە نازار اۋدارعانىن ايتتى. تەمىرجول سالاسىنا جاڭا جولدار سالۋ، پويىزدار مەن ۆاگوندار ساتىپ الۋ، سيفرلاندىرۋدى ەنگىزۋ سياقتى كەشەندى رەفورمالار قاجەت.
تەمىرجول جەلىسىن ەلەكتر ەنەرگياسىمەن قامتۋدىڭ تومەندىگى وتكىزۋ قابىلەتىنىڭ شەكتەلۋىنە، جولاۋشىلار مەن جۇك تاسىمالىنىڭ باياۋلاۋىنا سەبەپ بولىپ وتىر. ماسەلەن، شۋ-الماتى ۋچاسكەسىندە ەلەكتر ەنەرگياسى ءجيى ءۇزىلىپ، ترانزيتتىك الەۋەتىمىزدى تولىق پايدالانۋعا كەدەرگى كەلتىرۋدە. اەس قۇرىلىسى بۇل ماسەلەلەردى شەشىپ، وتاندىق تەمىرجول جۇيەسىنە قولجەتىمدى ءارى سەنىمدى ەلەكتر ەنەرگياسىن جەتكىزەدى.