اەس سالۋدى قولداۋ جونىندەگى حالىقتىق شتاب مۇشەلەرى جامبىل وبلىسىنا كەلىپ، اتوم ەنەرگەتيكاسىنىڭ بولاشاعى مەن ونىڭ مەملەكەتكە پايداسىن تۇرعىندارمەن تالقىلادى، دەپ حابارلايدى aqshamnews.kz
تاراز قالاسىندا شتاب مۇشەلەرى ءوڭىردىڭ پەداگوگتارىمەن كەزدەسۋ وتكىزدى، وعان 350-دەن استام ادام قاتىستى. شتاب مۇشەلەرى مەملەكەت باسشىسىنىڭ ءبىلىم بەرۋ مەن مۇعالىمدەرگە ەرەكشە كوڭىل بولەتىنىن اتاپ ءوتتى. "پەداگوگ مارتەبەسى تۋرالى" زاڭ قابىلدانىپ، ۇستازداردىڭ جالاقىسى مەن الەۋمەتتىك قامسىزداندىرىلۋى ارتقانىن، ءبىلىم بەرۋ ينفراقۇرىلىمى جاقسارىپ، "جايلى مەكتەپتەر" سالىنۋدا ەكەنىن تىلگە تيەك ەتتى. سوندىقتان ۇستازدار قاۋىمىنىڭ اەس تاقىرىبىنا قاتىستى تولىق اقپارات الىپ، بەيبىت اتومنىڭ ارتىقشىلىقتارىن ءتۇسىنۋى اسا ماڭىزدى دەپ اتاپ ءوتتى.
ءماجىلىس سپيكەرى، «AMANAT» پارتياسىنىڭ ءتوراعاسى ەرلان قوشانوۆ اتوم ەلەكتر ستانسياسى ەلىمىزگە ەنەرگەتيكالىق تاۋەلسىزدىككە قول جەتكىزەتىن بولاشاقتىڭ جوباسى ەكەنىن ايتتى. ول اەس سالۋ مۇمكىندىگىن جىبەرىپ الماۋ كەرەكتىگىن ەرەكشە اتاپ ءوتتى.
– رەفەرەندۋمعا دەيىن از ۋاقىت قالدى. مۇندا وبلىستىڭ ۇزدىك ۇستازدارى جينالىپ وتىر. سىزدەردىڭ بەدەلدەرىڭىز جوعارى، سوزدەرىڭىز ءوتىمدى. پرەزيدەنتتىڭ رەفورمالارى مەن باستامالارىن ءاردايىم قولداپ كەلەسىزدەر. ەل بولاشاعى ءۇشىن دۇرىس تاڭداۋ جاساۋ جولىندا تىزە قوسا جۇمىس ىستەيمىز دەپ سەنەمىن. بارشاڭىزدى اەس سالۋ جونىندەگى باستامانى قولداۋعا شاقىرامىن، – دەدى ەرلان قوشانوۆ.