مەملەكەت باسشىسى قاسىم-جومارت توقايەۆ حالىققا جولداۋىندا ەلدەگى ەنەرگيا تاپشىلىعى ماسەلەسىنە كەڭىنەن توقتالىپ، اتوم ەلەكتر ستانساسىنىڭ قۇرىلىسى بويىنشا جالپىۇلتتىق رەفەرەندۋمدى 6 قازانعا بەلگىلەدى. وسىعان وراي «قازاقستان اتوم ەلەكتر ستانسالارى» ج ش س باس مەنەدجەرى اسۋان سيابەكوۆ اتوم ەنەرگەتيكاسىنىڭ ماڭىزدىلىعى مەن قاۋىپسىزدىگى تۋرالى ويلارىمەن ءبولىستى.
ەگەر جالپىۇلتتىق رەفەرەندۋمدا حالىق دۇرىس تاڭداۋ جاساسا، ەلگە قاي رەاكتورلىق تەحنولوگيانى ورناتۋ كەرەكتىگىن مۇقيات زەرتتەۋ قاجەت بولادى. باستاپقىدا 13 رەاكتورلىق تەحنولوگيا زەردەلەندى، ولاردىڭ ىشىندە جۇڭگو، وڭتۇستىك كورەيا، رەسەي، اقش جانە فرانسيا ۇسىنعان تەحنيكالىق-كوممەرسيالىق نۇسقالار بار. قازاقستانعا قىسىمداعى سۋ رەاكتورلارى قولايلى دەپ تانىلدى. الەمدە 415 رەاكتوردىڭ 200ء-ى وسىنداي سۋ-سۋ نەمەسە قىسىمداعى سۋ رەاكتورلارى بولىپ تابىلادى.
ماگاتە (اتوم ەنەرگياسىن قاداعالاۋ اگەنتتىگى) جاڭادان اەس سالاتىن مەملەكەتتەرگە ءتيىمدى جوبالاردى ۇسىنادى. ءبىز 13 تەحنولوگيانى قاراستىرىپ، قاۋىپسىزدىك پەن نورماتيۆتىك قۇجاتتار نەگىزىندە 4 رەاكتوردى ىرىكتەپ الدىق. ولاردىڭ بارلىعى تەحنيكالىق جانە قاۋىپسىزدىك تالاپتارىنا ساي.
فرانسيا قىسىمداعى سۋ تەحنولوگياسىن 50-جىلداردان بەرى قولدانادى، ال وڭتۇستىك كورەيانىڭ تەحنولوگياسى امەريكالىق ۇلگىگە نەگىزدەلگەن. بۇل ەلدەردە تەحنولوگيالار قاۋىپسىزدىگى جوعارى دەڭگەيدە دالەلدەنگەن. سونىمەن قاتار، جۇڭگو دا وسى تەحنولوگيانى دامىتىپ، ونى ءوز ەلىندە جانە شەتەلدە قولدانادى. رەسەيدىڭ «روساتوم» كومپانياسى اتوم ەنەرگەتيكاسىنىڭ بارلىق ومىرلىك سيكلىن قامتيتىن كەشەندى شەشىمدەردى ۇسىنادى.
ەلىمىزدە مامانداردى دايارلاۋ جولعا قويىلعانىمەن، ءاربىر رەاكتوردىڭ وزىندىك ەرەكشەلىگى بار. سول سەبەپتى، رەاكتورلىق تەحنولوگيالاردى جاساعان ەلدە تاجىريبەدەن ءوتۋ ماڭىزدى. اەس قۇرىلىسى كەزىندە جەمقورلىق ماسەلەسى الاڭداتادى، ءبىراق حالىقارالىق ۇيىمدار مەن ماگاتە تاراپىنان بارلىق كەزەڭدەر قاتاڭ باقىلاۋدا بولادى.
اەس قۇرىلىسى تەك ەنەرگيا كوزى عانا ەمەس، جاڭا جۇمىس ورىندارى اشىلىپ، عىلىمي زەرتتەۋلەرگە مۇمكىندىك بەرەدى. اتوم ەنەرگەتيكاسى ەلىمىز ءۇشىن ماڭىزدى قادام بولماق