اەس سالۋدى قولداۋ جونىندەگى حالىقتىق شتاب تالعار اۋدانىنداعى «NUR KAGAZY» ءجشس-نىڭ ۇجىمىمەن كەزدەسۋ وتكىزدى. جيىن بارىسىندا اتوم ەنەرگەتيكاسىنىڭ قازاقستان ەكونوميكاسى مەن ەنەرگەتيكالىق قاۋىپسىزدىگىنە ىقپالى تالقىلاندى، دەپ حابارلايدى aqshamnews.kz
حالىقتىق شتابتىڭ مۇشەسى ءلاززات تۇرلاشوۆ ءوز سوزىندە اەس-تىڭ ەلىمىز ءۇشىن ماڭىزدى ستراتەگيالىق جوبا ەكەنىن اتاپ ءوتتى. ول اتوم ەنەرگەتيكاسىنىڭ ەلدى ەنەرگەتيكالىق تاۋەلسىزدىككە جەتكىزەتىن باستى قادام ەكەنىنە باسا نازار اۋداردى.
«ءبىز ءقازىر جاڭا ەنەرگەتيكالىق كەزەڭنىڭ الدىندا تۇرمىز. اەس – تەك سەنىمدى ەلەكتر كوزى عانا ەمەس، ەلىمىزدىڭ ەكونوميكالىق دامۋىنىڭ نەگىزگى قوزعاۋشى كۇشىنە اينالادى. قازىرگى تاڭدا ەلىمىزدەگى ەلەكتر ەنەرگياسىنىڭ 70%-ىن كومىر ستانسيالارىنان الىپ وتىرمىز، ءبىراق بۇل ءتاسىلدىڭ ەكولوگيالىق تۇرعىدان ءتيىمسىز ەكەنى بەلگىلى. اەس سالۋ – وسى ماسەلەلەردى شەشۋدىڭ وڭتايلى جولى»، – دەدى تۇرلاشوۆ.
ءوندىرىس قىزمەتكەرى ءسابيت تاستەمىروۆ تە ءوز پىكىرىن ءبىلدىرىپ، ەلەكتر قۋاتىنىڭ جەتىسپەۋشىلىگى ءوندىرىس ورىندارىنا كەرى اسەرىن تيگىزەتىنىن ايتتى. ول اەس سالۋ ارقىلى ەلىمىزدە تۇراقتى ەنەرگيامەن قامتاماسىز ەتىلىپ، ارتىق قۋاتتى ەكسپورتتاۋعا مۇمكىندىك تۋاتىنىن اتاپ ءوتتى.
كەزدەسۋگە قاتىسۋشىلار اەس جوباسىنىڭ ەكونوميكالىق جانە ەكولوگيالىق تيىمدىلىگىن تالقىلاپ، ەل بولاشاعى ءۇشىن بۇل جوبانى قولداۋعا دايىن ەكەندەرىن جەتكىزدى.