دۇنيەجۇزىلىك دەنساۋلىق ساقتاۋ ۇيىمى (ددۇ) يوردانيانى الەمدە الاپەس اۋرۋىنان قۇتىلعان العاشقى ەل ەكەنىن رەسمي تۇردە جاريالادى.
بۇل جايىندا islam.kz پورتالى newsonair.gov.in اقپارات كوزىنە سىلتەمە جاساي وتىرىپ ءمالىم ەتەدى، دەپ حابارلايدى aqshamnews.kz.
«دۇنيەجۇزىلىك دەنساۋلىق ساقتاۋ ۇيىمى (ددسۇ) يوردانيا كورولدىگىن الەمدەگى رەسمي تۇردە الاپەستەن تازا ەل بولعانىمەن قۇتتىقتايدى. بۇل ماڭىزدى جەتىستىك دەنساۋلىق ساقتاۋ سالاسىنداعى جاھاندىق كۇش-جىگەردىڭ جاڭا داۋىرگە اياق باسقانىن بىلدىرەدى»، دەپ مالىمدەدى اتالمىش ۇيىم. مالىمدەمەدە يوردانيانىڭ جيىرما جىلدان استام ۋاقىت بويى الاپەس اۋرۋىنا ەشكىمنىڭ شالدىقپاعانى ايتىلعان. الاپەس – Mycobacterium leprae باكتەرياسى تۋدىراتىن سوزىلمالى جۇقپالى اۋرۋ. تەرىگە، پەريفەريالىق جۇيكە جۇيەسىنە، جوعارعى تىنىس جولدارىنىڭ شىرىشتى قاباتتارىنا جانە كورۋ قابىلەتىنە كەرى اسەر ەتەدى. الاپەس اۋرۋىنان ەرتە ەمدەلگەن ناۋقاس دەرتىنەن قۇلان تازا جازىلادى.