ءماجىلىس دەپۋتاتى ەرمۇرات ءباپي كەشە كۋلۋاردا جۋرناليستەرگە قىمباتشىلىق ماسەلەسىنە قاتىستى پىكىر ءبىلدىردى. بۇل قوعامدا قىزۋ تالقىلانعان ەدى. ول ايماقتاردى ارالاعان كەزدە "قاتتى قيىندىق كورىپ جۇرگەن حالىقتى بايقاماعانىن" ايتقان بولاتىن. دەپۋتات بۇل ءسوزىن Aqshamnews.kz تىلشىسىنە ءتۇسىندىرىپ، الەۋمەتتىك جەلىدە تارالعان ۆيدەوداعى كونتەكستتىڭ بۇرمالانعانىن ايتتى.
"الەۋمەتتىك جەلىگە كەسىلىپ كەتكەن. ماعان جۋرناليست "سايلاۋشىلارمەن كەزدەسۋدە قىمباتشىلىققا قامالعان ادامداردى كوردىڭىز بە؟" دەدى. سۇراقتىڭ باسى كەسىلىپ قالعان. قانداي سۇراق – سونداي جاۋاپ. مەن كورمەدىم دەدىم. كەزدەسۋدە قىمباتشىلىق ماسەلەسىن كوتەرگەن ادام بولمادى. ال نەگىزىندە قىمباتشىلىق بار، ول الەمدىك ترەند بولىپ كەتكەن. امەريكا، ەۋروپا، مىسالى كورشىمىز رەسەيدە بەنزيننىڭ 1 ءليترى 1 دوللارعا جەتتى. ال مۇنى توقتاتۋدىڭ امالىن ۇكىمەت جاساۋى كەرەك. بازار مەن الاڭ اراسىنداعى دەلدالداردى ازايتۋ كەرەك. ويتكەنى ەگىس دالاسىنان تاۋار "كوك بازارعا" جەتەمىن دەگەنشە 4-5 دەلدالدان وتەدى"، – دەدى ول.
ءبىراق دەپۋتات قىمباتشىلىقتى سەزىنەتىنىن مويىندادى.
"ارينە، ءبىز ەندى اپتاسىنا ءبىر رەت بازارعا بارامىز. ءبىراق قالتامدى قاعىپ جاتىر دەپ تە ايتا المايمىن. وتباسىندا ەكى ادامبىز. بالالار ءوسىپ كەتتى. قينالىپ، زارداپ شەگىپ، زار يلەپ ءجۇرمىن دەپ ايتا المايمىن"، – دەدى ءباپي.
بۇل پىكىر قوعامدا قىزۋ پىكىرتالاس تۋعىزدى. دەپۋتات قىمباتشىلىق ماسەلەسىن شەشۋ ءۇشىن ۇكىمەتكە ناقتى قادامدار قاجەت ەكەنىن، اسىرەسە دەلدالدار سانىن ازايتۋ كەرەكتىگىن العا تارتتى.
ەسكە سالايىق، ەرمۇرات ءباپي كەشە كۋلۋاردا جۋرناليستەرگە ايماقتاردى ارالاعان كەزدە "قاتتى قيىندىق كورىپ جۇرگەن حالىقتى بايقاماعانىن" ايتقان بولاتىن.
"ارينە، اڭگىمە بار ول جەردە. قىمباتشىلىق تۋرالى اڭگىمە قاي جەردە بولسىن بار. ءبىراق جالپى مەنىڭ ءوزىم شىعىستا بولدىم، سەمەيدە بولدىم. الماتى وبلىسىندا بولدىم. ءبىراز جەردە بولدىم. سونداي ءبىر قاتتى قيىنشىلىققا تاپ بولعان حالىق بار – دەگەن ءسوز كورگەن جوقپىن. ءبىراق، جەكەلەگەن ءبىر وتباسىلار بار ەكەن"، – دەدى دەپۋتات.