سيفرلانعان ءداۋىر ەسىمىزدى ەكرانعا ەلىتىپ، پايىمداۋىمىزدى پەرنەتاقتاعا بايلاپ تاستاعانداي. اق قاعازعا قالاممەن جازۋ دا كوبىمىز ءۇشىن سيرەك ساتكە اينالىپ بارادى. ءبىراق ءدال وسىنداي داۋىردە قازاقستاندىق قىزدىڭ نازىك قولتاڭباسى شەتەلدىك برەندتەردىڭ نازارىن جاۋلاپ، ونى حالىقارالىق جوبالارعا دەيىن جەتەلەگەنىن بىلەسىز بە؟ اqshamnews.kz ءتىلشىسى قالاممەن عالامدى تاڭعالدىرعان قىزىلوردالىق قىزدىڭ ەرەكشە وقيعاسى جايلى تىلدەستى.
ب ا ق پەن ەڭبەكتىڭ توعىسى
ارۋجان تولەپوۆا - قىزىلوردا قالاسىنىڭ تۋماسى. كاسىبي ماماندىعى بويىنشا IT-مەنەدجەر. دەگەنمەن، ونىڭ ءومىر جولىن ءۇشىنشى كۋرستا وقىپ جۇرگەنىندە كەزدەيسوق كورگەن ءبىر بەينەروليك تۇبەگەيلى وزگەرتكەن. ول جەلىدەن كالليگرافيامەن اينالىساتىن قىزدىڭ پاراقشاسىن كورىپ، بۇل سالاعا قىزىعۋشىلىق تانىتادى. "مەن دە جازىپ كورەيىنشى" دەگەن نيەتپەن قولىنا قالام العان ارۋ، ءحوببيىنىڭ قالايشا كاسىبىنە اينالعانىن اڭگىمەلەپ بەردى.
"مەكتەپتە وقىپ جۇرگەنىمدە دە جازۋىم ادەمى بولدى. مۇعالىمدەرىم ءجيى ماقتايتىن. نەگىزى جازۋى ناشار ادام دا كالليگرافيانى مەڭگەرىپ الا الادى. ال مەنىڭ بۇل سالاعا قىزىعۋشىلىعىم حوببيىمە اينالدى. مەن پروسەسستەن، ياعني ءوزىم جازعان ءاربىر جازبادان ءلاززات الاتىنمىن. ەشكىم تاپسىرىس بەرمەسە دە، وزىمە ۇناعاندىقتان كەز كەلگەن نارسە جازا بەرەتىنمىن. سول سۇيىسپەنشىلىك، سول تۇراقتىلىق ءبارىن وزگەرتتى"، – دەيدى ارۋجان.
العاشقى تابىس پەن شەتەلدىك ۇسىنىس
سۇيىكتى ءىسىن تاپقان ارۋجاننىڭ ەڭ العاشقى كاسىبي تاپسىرىسى فرانسيادان كەلدى.
"جەلىگە كالليگرافيالىق جۇمىستارىمدى جاريالاپ تۇراتىنمىن. بىردە فرانسۋز ۇيىنەن حابارلاسىپ، اشىقحاتتاردى جازۋعا شاقىردى. ول حابارلامانى وقىعاندا سەنەر-سەنبەسىمدى بىلمەدىم. بۇل مەنىڭ ومىرىمدەگى جاڭا كەزەڭنىڭ باستاۋى بولدى"، – دەيدى ول.
سودان بەرى ونىڭ Instagram-پاراقشاسى كاسىبي پورتفوليوعا اينالدى. الەمدىك برەندتەر نازار اۋدارىپ، بىرىنەن سوڭ ءبىرى بايلانىسقا شىعا باستايدى.
"قاتە بولىپ قالدى، باسقا پاراق بەرشى" دەپ ايتا المايسىڭ"
ءقازىر ارۋجان Chanel، MaxMara جانە BMW سەكىلدى وننان استام شەتەلدىك كومپانيالارمەن ارىپتەستىك ورناتقان. ءتىپتى ۇلىبريتانياداعى مەكتەپ ونى ءوز وقۋشىلارىنىڭ وقۋلىقتارىنا ىزگى تىلەكتەر جازۋعا شاقىردى.
"ماعان بەرىلگەن تاپسىرما كىتاپتاردىڭ ەڭ العاشقى بەتىنە اعىلشىنشا دايىن ماتىندەردى جازىپ شىعۋ بولدى. ءبىراق قاتتى ۋايىمدادىم. سەبەبى كىتاپ بەتتەرى شەكتەۋلى. "قاتە بولىپ قالدى، باسقاسىن بەرشى" دەپ ايتا المايسىڭ. قوبالجىسام دا، بارىنشا تىرىستىم. كەيىن مەكتەپ باسشىلىعى جۇمىسىما ءدان ريزا بولدى"، -دەدى ول.
"ادەمى جازۋ كالليگرافيا ەمەس"
ارۋجان كالليگرافيا مەن ادەمى جازۋدىڭ ايىرماسىن ناقتىراق ءتۇسىندىردى:
"كالليگرافيا جاي ادەمى قولتاڭبا قالدىرۋ ەمەس. ول – ءوز زاڭدىلىعى بار ونەر. ءار ءارىپتىڭ كولبەۋى، سيممەترياسى، ىرعاقتىلىعى ەسەپپەن جاسالادى. مۇندا شىدامدىلىق پەن دالدىك قاجەت. بۇل سپورت سەكىلدى: كۇن سايىن جاتتىعۋ كەرەك"، - دەپ قوستى جاس كالليگراف.
ول كەز كەلگەن ادام بۇل ونەردى ۇيرەنە الادى دەيدى: باستىسى - قىزىعۋشىلىق پەن تاباندىلىق.
"ءبىر ساعاتتا 250 مىڭ تەڭگە تابۋعا بولادى"
ارۋجاننىڭ ايتۋىنشا، ەۋروپا مەن تاياۋ شىعىستا، اسىرەسە دۋباي، لوندون، نيۋ-يورك سياقتى قالالاردا كالليگرافتار luxury برەندتەردىڭ ءىس-شارالارىندا ساعاتىنا 100–300 دوللار الادى. ال پرەميۋم دەڭگەيدەگى يۆەنتتەردە بۇل سوما 500 دوللارعا دەيىن بارادى. ياعني ءبىر عانا ساعاتتىق جۇمىس ءۇشىن شامامەن 50–250 مىڭ تەڭگە تولەنەدى.
ودان بولەك، شاقىرۋ بيلەتتەرى مەن اشىقحاتتارعا جازىلاتىن ءماتىن جول-جولىمەن ەسەپتەلەدى: شەتەلدە ءبىر جولى 2–10 دوللار، ال كونۆەرتتىڭ ءارقايسىسى 3–8 دوللار شاماسىندا باعالانادى. ارۋجاننىڭ ويىنشا، قازاقستاندا بۇل نارىق ەندى عانا قالىپتاسىپ كەلەدى، ءبىراق سۇرانىس جىل سايىن ارتىپ جاتىر.
"1–2 جىل ىشىندە بىزدە دە وسى دەڭگەيگە جاقىندايتىن پرايستار پايدا بولادى دەپ سەنەمىن"، – دەيدى ول.
قولتاڭبانىڭ قۇندىلىعى مەن كەلەشەككە جوسپار
ارۋجاننىڭ ايتۋىنشا، كالليگرافيا بۇگىنگى قوعامدا ەرەكشە ماڭىزعا يە:
"ءقازىر ءبارى دايىن، ءبارى سيفرلانعان. ءبىراق سونىڭ سالدارىنان ادامداردىڭ ويلاۋ قابىلەتى مەن ەستە ساقتاۋ قابىلەتى السىرەپ بارادى. كالليگرافيا ميدى بەلسەندى جۇمىس ىستەۋگە ۇيرەتەدى، زەيىندى ارتتىرادى. ءبارى جاساندى زاماندا، قولمەن جازىلعان، جاسالعان دۇنيەنىڭ قۇنى دا، ءمانى دە ارتىپ كەلەدى. كومپيۋتەرلىك قارىپتەر دە ءبىر كەزدەرى شەبەرلەردىڭ قولىنان تۋعان. ءبىراق ولاردىڭ ءتىرى قولتاڭباسى – مۇلدە باسقا دۇنيە"، – دەيدى ول.
ارۋجاننىڭ ەندىگى ماقساتى ايقىن. ول جەكە كالليگرافيا ستۋدياسىن اشىپ، شاكىرت تاربيەلىگىسى كەلەتىنىن ايتتى.
"مەنىڭ ارمانىم – قازاقستاندا كالليگرافيا مەكتەبىن قالىپتاستىرۋ. بالالار مەن ەرەسەكتەردى ۇيرەتىپ، وسى ونەردىڭ قۇندىلىعىن كورسەتۋ"، – دەيدى ول.
سونداي-اق، حالىقارالىق بايقاۋلار مەن شەبەرلىك ساباقتارىنا قاتىسىپ، تاجىريبە الماسۋدى جوسپارلاپ وتىر.