بۇگىنگى كۇنى كورشى جۇڭگو ەلىمەن دە بايلانىس تۇزەلىپ، بارىس-كەلىس ارتتى. بۇل زامان تالابى. ەكى ورتاداعى الىس-بەرىستە ارتتى. ارالاستىق ارتقان جەردە مادەني الماسۋلاردىڭ ورىن الاتىنى ايتپاسا تۇسىنىكتى. سوندىقتان ەكى ەل اراسىندا مادەني ءىس-شارالار بولىپ، مادەني الماسۋ بولىپ جاتقانىن كوز كورىپ جاتىر. كۇنى كەشە ق ر ۇلتتىق كىتاپحاناسىندا قازاق-قىتاي ادەبي بايلانىستارى جايلى «ادەبي دوستىق شۋاعى» اتتى حالىقارالىق ءىس-شارا ءوتتى، دەپ حابارلايدى aqshamnews.kz.
شارانىڭ وتۋىنە «شىڭجاڭ گازەتى» مەن «كورشىلەس» جۋرنالىنىڭ رەداكسياسى، «بەيجىڭ شانس حالىقارالىق مادەني الماسۋ» ج ش س، «شىعىس ادەبيەتى باسپاسى، ق ر ۇلتتىق كىتاپحاناسى مۇرىندىق بولىپتى. ايتا كەتۋ كەرەك شارانى اقىن، اۋدارماشى سايات قامشىگەر جۇرگىزىپ وتىردى. ەكى ەل اراسىنداعى مادەني بايلانىستىڭ ارتۋى ەل ادەبيەتى مەن تاريحي مۇرالاردى زەرتتەۋگە ۇلكەن جول ەكەنىن ءسوز اراسىندا سايات قامشىگەر ايتتى.
مۇنان كەيىن، العاشقى ءسوزدى العان الماتىداعى جۇڭگو باس كونسۋلدىعىنىڭ ۆيسە-كونسۋلى ليۋي ي مىرزا ءىس-شارانىڭ ماڭىزىنا توقتالدى. ەكى ەل اراسىنداعى ادەبي-مادەني بايلانىستاردى قولدايتىنىن، قاجەت بولعان جەردە دەمەۋشىلىك كورسەتۋگە دە دايىن ەكەنىن جەتكىزدى. ال شاراع ارنايى كەلگەن اقىن، جۋرناليست، ەتنوگراف، قازاقستاننىڭ ەڭبەك سىڭىرگەن قايراتكەرى، قازاقستان جازۋشىلار وداعى باسقارما ءتوراعاسىنىڭ ورىنباسارى قاسىمحان بەگمانوۆ قازاق-قىتاي مادەني بايلانىستارى، اتقارىلىپ جاتقان ادەبي جوبالار، تانىمال قالامگەرلەردىڭ شىعارمالارى جايلى كەلەلى ءسوز قوزعادى. ءوز كەزەگىندە ءسوز العان اقىن، حالىقارالىق «الاش» ادەبي سىيلىعىنىڭ لاۋرەاتى، ق ر مەملەكەتتىك كىتاپ پالاتاسى ديرەكتورىنىڭ ورىنباسارى مارالتاي رايىمبەك ۇلى دا ەكى ەلدىڭ اراسىنداعى بايلانىس تاريحي ەڭبەكتەردىڭ زەرتتەلۋىنە اشىلعان جول ەكەنىنە توقتالدى. اقىن تەبىرەنە وتىرىپ وقىعان ولەڭدەرى دە شارانىڭ ءمان-ماڭىزىن ارتتىرا ءتۇستى.
ال شاراعا كەلگەن ا.بايتۇرسىن ۇلى اتىنداعى ءتىل ءبىلىمى ينستيتۋتىنان كەلگەن عالىم، قىتايتانۋشى قايرات عابيتحان ۇلى، ءال-فارابي اتىنداعى قازۇۋ شىعىستانۋ فاكۋلتەتى، قىتايتانۋ كافەدراسىنىڭ مەڭگەرۋشىسى ەرجان كەرىمبايەۆ، قازاقستان جۋرناليستەر وداعىنىڭ مۇشەسى جولدىباي مۇزافاروۆ ەكى حالىقتىڭ ادەبي-مادەني بايلانىستارى جايىندا تەبىرەنە ءسوز سويلەدى. ال شاراعا ارنايى كەلگەن جەتىگەنشى تۇرسىناي الىبەك قىزى قازاقتىڭ ۇلتتىق اۋەندەرىن تامىلجىتا ورىنداسا، ءداستۇرلى ءانشى ماديار ءومىرعالى «دۋداراي» ءانىن شىرقاپ، كورشى ەل وكىلدەرىن تاڭقالدىردى. ال ءال-فارابي اتىنداعى قازۇۋ ستۋدەنتتەرى تاڭ ءداۋىرى پوەزياسىن، ليبايدىڭ جىرلارىن مانەرلەپ وقىدى. ءىس-شارانى «شىعىس ادەبيەتى» باسپاسىنىڭ باسشىسى جەڭىس ومار قورىتىندىلادى.