2024 جىلعى 17 اقپاندا ۇلتتىق قاۋىپسىزدىك كوميتەتى ىىم-مەن بىرلەسە جانە باس پروكۋراتۋرانىڭ ۇيلەستىرۋىمەن جۇزەگە اسىرعان وپەراسيا شەڭبەرىندە اقتوبە، اتىراۋ، شىعىس قازاقستان، جامبىل، باتىس قازاقستان، تۇركىستان، جەتىسۋ وبلىستارى جانە شىمكەنت قالاسىندا 8 توپتى بەيتاراپتاندىردى.
ولاردىڭ ورتاسىندا دەسترۋكتيۆتى ءدىني اعىم جاقتاستارى بار 23 ادام ۇستالدى. 17 ادام ۋاقىتشا ۇستاۋ يزولياتورىنا قامالدى، ال 6 قاتىستى كەلۋ تۋرالى مىندەتتەمە قولدانىلدى، دەپ حابارلايدى Almaty-akshamy.kz ۇلتتىق قاۋىپسىزدىك كوميتەتىنە سىلتەمە جاساپ.
ولار اۋىر جانە اسا اۋىر قىلمىستارعا، سونىڭ ىشىندە تەرروريزمدى ناسيحاتتاۋ، ادامداردى ۇرلاۋ، قورقىتىپ الۋ، سونداي-اق ەسىرتكى زاتتارى مەن اتۋ قارۋىنىڭ زاڭسىز اينالىمىنا قاتىسى بار دەپ كۇدىكتەلۋدە.
جاسالعان قۇقىققا قارسى ارەكەتتەرىن ءبىرقاتار جاعدايلاردا تەرىس بۇرمالانعان ءدىني قاعيدالارمەن اقتاپ جۇرگەن.
49 ءتىنتۋ بارىسىندا اتۋ قارۋى، وق-دارىلەر، ءدىني ادەبيەتتەر، اقشالاي قاراجات جانە ەسىرتكىلەر الىندى.
وپەراسيانى وتكىزۋگە رەسپۋبليكانىڭ 8 وڭىرىندە بىرمەزگىلدە 250 كۇشتىك قۇرىلىم قىزمەتكەرلەرى جۇمىلدىرىلدى.
تەرگەپ-تەكسەرۋ ءىس-شارالارى جالعاسۋدا.
قىلمىستىق-پروسەستىك كودەكستىڭ 201-بابى 1-بولىگىنە سايكەس وزگە اقپارات جاريا ەتۋگە جاتپايدى.