ادام قۇقىقتارى جونىندەگى ۋاكىل مەن بالالار ومبۋدسمانى الماتى قالاسى بويىنشا قاجد №11 مەكەمەسىنە باردى
ادام قۇقىقتارى جونىندەگى ۋاكىل ارتۋر لاستايەۆ الماتىعا جۇمىس ساپارى اياسىندا بالالار ومبۋدسمانى ارۋجان ساينمەن بىرگە الماتى قالاسى بويىنشا قاجد №11 تۇزەۋ مەكەمەسىنە بارىپ، كامەلەتكە تولماعان سوتتالعانداردى ۇستاۋ شارتتارىن قاراپ، ولاردىڭ سۇراقتارىنا جاۋاپ بەردى، - دەپ حاباراليدى almaty-akshamy.kz
نەگىزىنەن، سۇراقتار سوتتالعانداردى شارتتى تۇردە مەرزىمىنەن بۇرىن بوساتۋعا، كەزدەسۋلەردى ۇيىمداستىرۋ مەن وتكىزۋدىڭ نورماتيۆتىك تارتىبىنە قاتىستى بولدى.
«سوتتالعان ازاماتتاردىڭ جەكە سۇراقتارىنا جاۋاپ بەرۋ كەشەندى جۇمىستىڭ ماڭىزدى بولىگى بولىپ تابىلادى. بۇل پەنيتەنسيارلىق جۇيەدەگى جۇيەلىك ماسەلەلەردى انىقتاۋعا مۇمكىندىك بەرەدى. بارلىق كوتەرىلگەن ماسەلەلەر جابىق مەكەمەلەردە ۇستالاتىن ادامداردىڭ قۇقىقتارىن قامتاماسىز ەتۋ بويىنشا ودان ءارى شارالار قابىلداۋ ءۇشىن تالداناتىن بولادى»، - دەپ اتاپ ءوتتى لاستايەۆ.
سونىمەن قاتار ومبۋدسمان قالانىڭ قاجد باسشىلىعىمەن بىرلەسىپ مەكەمەنىڭ تۇرعىن، تۇرمىستىق جانە وندىرىستىك اۋماقتارىن قارادى. بەلگىلەنگەن تالاپتارعا سايكەس كەلەتىن وتريادتاردى، اسحانانى، كلۋبتى، كىتاپحانانيا، اكت زالىن، مەديسينالىق كابينەتتى جانە ۇزاق كەزدەسۋلەر وتكىزۋگە ارنالعان بولمەلەردى قاراپ شىقتى.
ءىس-شارا سوڭىندا ومبۋدسمان №11 مەكەمەدەگى جينالىس بارىسىندا الماتى قالاسى قاجد بولىمشەلەرى مەن مەكەمەلەرىنىڭ باسشىلارىنا قىلمىستىق-اتقارۋ جۇيەسى مەكەمەلەرىندە ۇستالاتىن كامەلەتكە تولماعانداردىڭ قۇقىقتارى مەن بوستاندىقتارىن قورعاۋدى ساقتاۋ جونىندەگى ادام قۇقىقتارى جونىندەگى ۋاكىلدىڭ وڭىرلىك وكىلىمەن ءوزارا ءىس-قيمىل جاساۋعا شاقىردى.
ادام قۇقىقتارى جونىندەگى ۋاكىلدىڭ جانە ونىڭ كەڭسەسى قىزمەتكەرلەرىنىڭ تۇزەۋ مەكەمەلەرىنە شىعۋ ساپارلارى تۇراقتى نەگىزدە جۇرگىزىلەتىن بولادى.