الماتىلىق گينەكولوگ قىزدارعا ادام پاپيللوما ۆيرۋسىنا قارسى ەكپە سالۋدىڭ ماڭىزدىلىعىن ءتۇسىندىردى
قازاقستاندا قىركۇيەك ايىندا اتا-اناسىنىڭ كەلىسىمىمەن 11 جاستاعى قىزداردى ادام پاپيللوماۆيرۋسىنا (اپۆ) قارسى ەگۋ ناۋقانى باستالادى.
اپۆ ۆاكسيناسى اسىرەسە قىزدار ءۇشىن وتە ماڭىزدى، سەبەبى ول جاتىر موينى وبىرى مەن ۆيرۋسپەن بايلانىستى باسقا دا ىسىكتەردىڭ دامۋىن بولدىرمايدى. ۆاكسينا جىنىستىق بەلسەندىلىككە دەيىن ەنگىزىلگەن جاعدايدا، ەڭ ءتيىمدى بولىپ تابىلادى جانە ءاپۆ-نىڭ ەڭ ءقاۋىپتى تۇرلەرىنەن 100%-عا جۋىق قورعاۋدى قامتاماسىز ەتەدى.
سونىمەن قاتار، ۆاكسيناسيا جىنىستىق سۇيەلدەردىڭ جانە باسقا جىنىستىق جولمەن بەرىلەتىن اۋرۋلاردىڭ ءقاۋپىن ازايتادى.
«ادام پاپيللوما ۆيرۋسىنىڭ 100-دەن استام ءتۇرى بار، ءبىراق ولاردىڭ بارلىعى ونكوگەندى ەمەس. ەڭ ءقاۋىپتى تۇرلەرى، مىسالى، 16 جانە 18، جاتىر موينى جانە باسقا دا قاتەرلى ىسىكتەردىڭ شامامەن 70%-ىن تۋدىرادى. 6 جانە 11 تيپتەرى جىنىس مۇشەلەرىنىڭ سۇيەلىنە اكەلۋى مۇمكىن، ولار قاتەرلى ىسىك سياقتى ءقاۋىپتى بولماسا دا، وتە ىڭعايسىز جانە قايتالاما ينفەكسيالارعا اكەلۋى مۇمكىن. جوعارى ونكوگەندى ءقاۋپى بار اپۆ باسقا تۇرلەرى دە قاتەرلى ىسىك تۋدىرۋى مۇمكىن، ءبىراق سيرەك كەزدەسەدى»، - دەيدى N11 قالالىق ەمحاناسىنىڭ گينەكولوگى اديليام ماحامەد.
وسىلايشا، اپۆ ۆاكسيناسياسى جىنىستىق بەلسەندىلىكتىڭ باستالۋىنا دەيىن ءتيىمدى بولاتىن جانە ۆيرۋستىڭ جوعارى ونكوگەندى تۇرلەرىنەن قورعايتىن نەگىزگى پروفيلاكتيكالىق شارا بولىپ تابىلادى.