ق ر مەديسينالىق اۆياسيا قىزمەتى كۇن سايىن ەل بويىنشا 3-تەن 15-كە دەيىن رەيس جاسايدى
قازاقستان رەسپۋبليكاسى دەنساۋلىق ساقتاۋ مينيسترلىگىنىڭ «جەدەل مەديسينا ۇلتتىق ۇيلەستىرۋ ورتالىعىنىڭ» باسقارما ءتوراعاسى ارمان بايانبايەۆ الماتى قالاسى وڭىرلىك كوممۋنيكاسيالار قىزمەتىنىڭ بريفينگىندە جەدەل اۆياسيالىق كومەك، دالىرەك ايتقاندا، مەديسينالىق اۆياسيا، جاعدايى اۋىر ناۋقاستاردى ەۆاكۋاسيالاۋ جانە ۇشۋ گەوگرافياسى جايلى ايتىپ بەردى، دەپ حابارلايدى اlmaty-akshamy.kz.
اتاپ وتەيىك، مەديسينالىق اۆياسيا – بۇل اۋە كولىگىن تارتۋ ارقىلى حالىققا شۇعىل تۇردە جەدەل مەديسينالىق كومەك كورسەتۋ. رەسپۋبليكالىق دەڭگەيدە اتالعان كومەك ەل تۇرعىندارىنا 2011 جىلدىڭ ساۋىرىنەن باستاپ كورسەتىلە باستادى. جىل سايىن بۇل قىزمەتكە ەلىمىزدىڭ ءۇش مىڭنان استام ازاماتى ءزارۋ.
ارمان بايانبايەۆ ق ر ازاماتتارىنا مەديسينالىق اۆياسيا تۇرىندە شۇعىل مەديسينالىق كومەك كورسەتۋ تەگىن مەديسينالىق كومەكتىڭ كەپىلدىك بەرىلگەن كولەمى اياسىندا جۇزەگە اسىرىلاتىنىن اتاپ ءوتتى.
ءبىزدىڭ ەلىمىزدە مەديسينالىق اۆياسيا جۇمىسى كەلەسى باعىتتار بويىنشا جۇرگىزىلەدى:
- بۇل ناۋقاستار تاسىمالداۋعا جارامسىز، اۋىر حالدە بولسا، ايماقتىق دارىگەرلەردىڭ قاجەتتى تەحنيكاسى نەمەسە بىلىكتىلىگى بولماسا، مامانداردىڭ كونسۋلتاسيا جۇرگىزۋ نەمەسە وپەراسيا جاساۋ ءۇشىن وقيعا ورنىنا ۇشىپ كەلۋى.
- مامانداندىرىلعان مەديسينالىق كومەك كورسەتۋ ءۇشىن ناۋقاستاردى وڭىرلەردەن وبلىسقا، وبلىستان رەسپۋبليكالىق ورتالىققا تاسىمالداۋ، وندا ولارعا جوعارى تەحنولوگيالىق كومەك كورسەتىلەدى.
- دونورلىق ورگاندار مەن بيومەتاريالدى تاسىمالداۋ.
- قاشىقتان كورسەتىلەتىن مەديسينالىق قىزمەتتەر.
«بۇگىندە مەديسينالىق اۆياسيا رەسپۋبليكا بويىنشا ورتا ەسەپپەن تاۋلىگىنە 3-تەن 15-كە دەيىن رەيس جاسايدى. رەيستەردىڭ ەڭ كوپ ۇلەسى جاراقاتتانۋ، ونىڭ ىشىندە جول-كولىك وقيعالارى سالدارىنان بولعان، سونداي-اق بالالار اراسىنداعى پاتولوگيا جاعدايلارىندا، قان اينالىمى جۇيەسى اۋرۋلارى، جاڭا تۋعان نارەستەلەردىڭ پاتولوگياسى، اكۋشەرلىك جانە گينەكولوگيالىق، حيرۋرگيالىق، تەراپيەۆتىك پاتولوگيالار جانە باسقا دا اۋرۋلار كەزىندە مەديسينالىق كومەك كورسەتۋ ماقساتىندا جۇزەگە اسىرىلادى، - دەدى وكق سپيكەرى.
ەل اۋماعىنىڭ ۇلكەندىگىن ەسكەرە وتىرىپ، ورتالىق جۇمىس ىستەگەن جىلدار ىشىندە جەدەل مەديسينالىق مامانداندىرىلعان كومەك كورسەتۋدىڭ ارقاسىندا، سونىڭ ىشىندە، جوعارى مامانداندىرىلعان مەديسينالىق كومەك كورسەتۋ، مامانداردى جەتۋ قيىن ايماقتارعا جەتكىزۋ، ناۋقاستاردى، سونداي-اق كەيىننەن ترانسپلانتاسيالاۋ ءۇشىن دونورلىق ورگانداردى تاسىمالداۋ كومەگىمەن مىڭداعان ادامنىڭ ءومىرىن ساقتاپ قالدى. حالىققا جەدەل مەديسينالىق كومەك كورسەتۋ قاجەتتىلىگى جىل سايىن ارتىپ كەلەدى.
قازىرگى ۋاقىتتا مەديسينالىق اۆياسيانىڭ 33 اۋە كەمەسى بار – 20 ۇشاق جانە 13 تىكۇشاق پايدالانىلادى. بارلىق پايدالانىلاتىن اۋە كەمەلەرىنىڭ قازاقستان رەسپۋبليكاسىنىڭ ازاماتتىق اۆياسيا كوميتەتىنىڭ سەرتيفيكاتى بار.
وسى قىزمەتتىڭ نەگىزى قالانعاننان بەرى (2011 جىلدان باستاپ) 2022 جىلدىڭ قازان ايىنا دەيىنگى بارلىق قىزمەت كەزەڭىندە مەديسينالىق اۆياسيا سالاسىندا ورىندالعان ۇشۋلار سانى 22 665 رەيستى قۇرادى.
دونورلىق اعزالاردى الۋ جانە تاسىمالداۋ ءۇشىن 78 رەيس جاسالدى. شەتەلدە اۋىر حالدە جاتقان قازاقستان رەسپۋبليكاسىنىڭ ازاماتتارى مەن قانداستاردى ەلىمىزدىڭ ەمحانالارىنا جەتكىزۋ ماقساتىندا الەمنىڭ 25 ەلىنە 107 شەتەلدىك رەيس جاسالدى.